Pavlodar soty balalaryn anasyna segiz jyldan keıin qaıtardy
PAVLODAR. QazAqparat - Pavlodar oblysynda sot ata-ana quqyǵynan aıyrylǵan anaǵa balalaryn segiz jyldan keıin qaıtardy. Іsti kámelettik jasqa tolmaǵandar isi jónindegi mamandandyrylǵan aýdanaralyq soty qarady, dep habarlaıdy QazAqparat pavlodarnews.kz saıtyna silteme jasap.
Ýspen aýdanynda turatyn áıel sottan tórt balasyn - úsh uly men qyzyn qaıtarýdy suraǵan. Ol tıisti talap-aryzdy balalar ornalasqan «Kenjekól» otbasylyq úlgidegi qalashyǵyna, Peschan arnaıy mektep-ınternatyna jáne «Jas Urpaq» kommýnaldyq memlekettik mekemesine joldaǵan.
Eń úlken bala 17 jasta bolsa, kishisi - toǵyzda. Segiz jyl buryn beıáleýmettik minez-qulqy úshin áıel analyq quqyǵynan aıyrylǵan. Sol kezde kishisi bir jasqa da tolmaǵan.
Sotta talapkerdiń ókili áıeldiń turmysqa shyǵyp, jumysqa ornalasqanyn jáne ár balaǵa arnalǵan bólmesi bar úıdi jalǵa alǵanyn aıtty. Osy jyldar boıy ol balalar úıine baryp, kıim men kerek zattar jetkizip otyrǵan. Qazir ol kúıeýimen jáne úlken ulymen birge otbasynyń basyn qaıta qosqysy keledi. Turǵylyqty jeri men jumys orny boıynsha oń minezdemesi de bar.
Sot otyrysynda aýdandyq bilim bóliminiń ókili talap-aryzben ishinara ǵana kelisti.
«Búgingi kúni otbasy turatyn turǵyn úı jóndeýdi qajet etedi. Óıtkeni úı uzaq ýaqyt qaraýsyz qalǵan. Turmystyq jaǵdaılaryn tekserý barysynda úıde sańyraýqulaqtar bar ekeni anyqtaldy. Bolashaqta munyń barlyǵy balalardyń densaýlyǵyna keri áser etýi múmkin. Sondyqtan jaqsy jóndeý jumysyn júrgizip, aýladaǵy qoqysty shyǵarý kerek. Talapkerge turǵyn úı máselesin sheshý qajet. Óıtkeni qazir olar turyp jatqan úıdiń ıesi bar. Ol ata-anasy qaıtys bolǵannan keıin murany resimdeýge nıetti», - dedi bilim bóliminde.
Oblystyq sottyń baspasóz qyzmetiniń habarlaýynsha, sot tórt balanyń anasynyń talabyn qanaǵattandyrǵan. Qazirgi ýaqytta kámeletke tolmaǵan balalar atalǵan otbasyǵa tárbıeleýge berildi.
