Pavlodar soty banktiń jetim azamatqa memlekettik qoldaýdy toqtatýyn zańsyz dep tanydy
PAVLODAR. KAZINFORM — Oblystyq mamandandyrylǵan aýdanaralyq ákimshilik sotynyń málimetinshe, turǵyn úı quqyǵyn qorǵaýdy suraǵan azamat ákimshilik talap qoıýmen sotqa júgingen.
Talap qoıýshy 2016 jyly jetim balalar men ata-anasynyń qamqorlyǵynsyz qalǵan balalar sanaty boıynsha memlekettik turǵyn úı qorynan baspanaǵa muqtajdar esebine qoıylǵan. Keıin turǵyn úıge muqtaj azamattardy esepke alý jáne memlekettik qoldaý sharalaryn bólý fýnktsııalary «Otbasy bank» AQ-na berilgen.
2026 jyly júrgizilgen túgendeý barysynda talap qoıýshynyń jubaıynyń atyna tirkelgen jyljymaıtyn múlik anyqtalǵan. Osyǵan baılanysty bank azamatqa memlekettik qoldaý sharalaryn kórsetýdi toqtatqan.
Sot bul sheshimdi zańsyz dep tapty.
— Sot túgendeý nátıjeleri boıynsha memlekettik qoldaý sharalaryn kórsetýdi toqtata turý túrindegi sharany qoldaný zańda kózdelmegenin anyqtady, — dep habarlady Pavlodar sotynan.
Sonymen qatar sot qoldanystaǵy zańnamada jetim balalar men ata-anasynyń qamqorlyǵynsyz qalǵan balalardy turǵyn úı alǵanǵa deıin belgili bir jaǵdaılar týyndaǵanyna qaramastan, esepten shyǵarýǵa tyıym salynatynyn atap ótti. Sottyń qorytyndysy boıynsha, memlekettik qoldaý sharalaryn negizsiz toqtatý talap qoıýshynyń turǵyn úı quqyqtary men zańdy múddelerin buzǵan.
Nátıjesinde «Otbasy banktiń» áreketi zańsyz dep tanylyp, azamattyń memlekettik turǵyn úı qorynan baspana alý quqyǵy qalpyna keltirildi. Bul rette onyń 2016 jyly turǵyn úıge muqtajdar esebine alǵash qoıylǵan kúni saqtaldy.
Eske sala keteıik, Pavlodarda ekonomıkalyq qylmystar boıynsha keltirilgen zalal 3,4 mlrd teńge boldy.
