Pavlodar sharýalary rekordtyq 1,1 mln tonna astyq jınady

ASTANA. KAZINFORM – Pavlodar oblysy aýyl sharýashylyǵyna tartylǵan ınvestıtsııalar boıynsha kósh bastap tur. Óńirdiń agrarlyq jetistikteri týraly ákim Asaıyn Baıhanov aıtyp berdi.

Ákimniń aıtýynsha, sońǵy 10 jylda óńir ekonomıkasy birtindep ártaraptanyp keledi. Pavlodar buryn tek ónerkásiptik-shıkizat óńdeıtin aımaq bolsa, qazir óńdeý ónerkásibi damyp, aýyl sharýashylyǵy da ósim kórsetken. 

– Ásirese aımaǵymyz aýyl sharýashylyǵyna tartylǵan ınvestıtsııalar boıynsha elde kósh bastap tur. Bıyl bul kórsetkish 225 mlrd teńgege jetkiziledi. Nátıjesinde dıqandar rekordtyq 1,1 mln tonna astyq jınady, – dedi A. Baıhanov elordada Ortalyq kommýnıkatsııalar qyzmetinde.

Aýyl sharýashylyǵynyń osyndaı qarqyndy damýy azyq-túlik baǵalarynyń turaqtalýyna da oń áser etýde.

Qazirdiń ózinde óńirde 16 azyq-túlik taýarlary boıynsha baǵa respýblıka ortasha deńgeıinen tómen, al 11 taýar boıynsha Úzdik-5 óńirdiń qataryna kiredi.

Pavlodar oblysy eldegi qaraqumyq óndirýdiń 65% paıyzyn qamtamasyz etedi, kúnbaǵys óniminiń besten bir bóligin, al ár úshinshi sábiz ben kartop ta osy óńirden keledi.

Buǵan deıin Asaıyn Baıhanov Ekibastuzdaǵy jańa zaýyttarǵa zııandy zattardy ustaıtyn súzgiler ornatylǵanyn aıtqan edi.

Aıta keteıik, Pavlodarǵa 1 trln teńgeden astam ınvestıtsııa tartyldy. Bul – ótken jylmen salystyrǵanda 1,5 ese kóp. Osy nátıjemen óńir respýblıkada 2-shi orynda tur.