Pavlodar-Semeı ýchaskesi júk kólikter úshin aqyly bolady
NUR-SULTAN. QazAqparat – «Nurly Jol» ınfraqurylymdy damytý memlekettik baǵdarlamasyna sáıkes bıyl Shyǵys Qazaqstan oblysynda «RF shekarasy (Omby) - Maıqapshaǵaı» avtojolynyń Pavlodar oblysynyń shekarasynan Semeı qalasyna deıingi ýchaskede (587-733 shaqyrym) aqyly júıe iske qosylady.
Memlekettik baǵdarlamany júzege asyrý josparynyń negizinde, Qazaqstan Respýblıkasynyń Indýstrııa jáne ınfraqurylymdyq damý mınıstrligi men «QazAvtoJol» UK» AQ birlesip tólem alýdyń «ashyq júıesin» engizý týraly sheshim qabyldady, dep habarlaıdy QazAqparat «QazAvtoJol» UK» AQ baspasóz qyzmetine silteme jasap.
Júıeniń ereksheligi – ýchaskelerde shlagbaýmdar bolmaıdy. Avtokólikterdiń júrip ótken joly týraly aqparat arkalarda ornalasqan arnaıy kameralar arqyly tirkeledi.
Pavlodar – Semeı ýchaskesi ІІ tehnıkalyq sanattaǵy avtojol bolǵandyqtan, tek júk kólikterden ǵana tólem alynatyn bolady.
Aqyly ýchaske boıynsha jol aqysyn ekinshi deńgeıdegi bankter (Kaspı, hoýmbank jáne t.b. sııaqty ınternet-bankıng qosymshalaryn qosa sanaǵanda), tólem termınaldary (Qiwi, woopay), sondaı-aq Ksell, Aktıv, Bılaın mobıldi baılanys operatorlarymen SSID kod jiberý arqyly tóleýge bolady. Jalpy avtokóliktiń jeke shotyn toltyrýdyń 20-dan astam tásili bar. Tolyq aqparat qaj.kz saıtynda jarııalanǵan.
Sondaı-aq, júrgizýshiler men jolaýshylardyń qolaılyǵy úshin mamandar KAJ Mobaıl atty mobıldik qosymshany jasap shyǵardy. Búginde, bul qosymsha arqyly jeke shottaǵy qarajatty, júrip ótken jol týraly aqparatty bilýge bolady. Keri baılanys ta bar.
Aldaǵy ýaqytta A pýnktinen B pýnktine deıingi marshrýtty esepteý (uzyndyǵy men baǵasy) jol boıyndaǵy barlyq servıs nysandary kórsetilgen ınteraktıvti karta men PUSH habarlandyrýlar da iske qosylady.
Aqyly ýchaskege qatysty barlyq máseleler boıynsha paıdaly aqparat berý úshin Semeı qalasynyń shyǵaberisinde klıenttermen jumys isteý ortalyǵy iske qosylady. Sondaı-aq, 1403 nómirindegi baılanys ortalyǵyna da habarlasýǵa bolady.
