Pavlodar-Semeı avtojolynda jol apatynan er adam kóz jumdy
PAVLODAR. KAZINFORM - Oqıǵa ótken túnde Qaraqala aýylynyń mańynda bolǵan. Apat saldarynan dene súıegi birneshe jerden synǵan júrgizýshi aýrýhanada qaıtys boldy.
Pavlodar-Semeı avtojolynda jeńil kólik qatty jyldamdyqpen kele jatyp jol shetine túsip ketken.
Bul týraly óńirlik jedel járdem stansasynan habarlady.
«Apat saldarynan kólik júrgizýshisiniń dene súıekteri birneshe jerinen synyp, aýyr jaraqat alǵan. Jedel járdem brıgadasy 28 jasar azamatty Aqqýly aýdandyq aýrýhanasyna jetkizdi. Alaıda zardap shekken azamatty aman alyp qalý múmkin bolmady», - dep málimdedi jedel járdem stansasynan.
Ótken demalys kúnderi oblystaǵy 103 qyzmetiniń medıtsınalyq brıgadalary iri jol-kólik apattary boıynsha 4 shaqyrtýǵa barǵan. Ekibastuz qalasy men Maıqaıyń kenti arasyndaǵy jolda avtokólik joldan shyǵyp ketip, 3 adam zardap shekse, Omby jolyndaǵy avtokólikterdiń soqtyǵysýynan 2 adamnyń densaýlyǵyna zııan kelgen. Budan bólek oblys ortalyǵyndaǵy jol-kólik apatynan 57 jastaǵy áıel jaraqat alyp, aýrýhanaǵa jatqyzyldy.
