Pavlodar saıajaılarynda tarıf birden 50 paıyzǵa qymbattady

PAVLODAR. KAZINFORM — Eń qymbat sý tarıfi «Entýzıast» baǵbanshylyǵynda tirkelip otyr. Munda ár saıajaı ıesi burynǵydan 40 paıyzǵa kóp tóleıtin bolady.

Ótken jyly ár saıajaı ıesi bir maýsymǵa 28 myń teńge tólep kelse, bıyl bul soma birden 42 myń teńgege ósken. Turǵyndar alty sotyq jer úshin bul soma óte qymbat ekenine shaǵymdanyp otyr.

«Entýzıast» baǵbanshylyǵynyń basshysy Vıtalıı Malıkov bul sharasyzdyqtan jasalyp otyrǵan qadam ekenin aıtady.

Sý tarıfinen bólek, baǵbanshylyq saıajaılarǵa qyzmet kórsetetin 20-dan astam jumysshy ustaıdy. Olardyń eńbekaqysy bıyl ósken. 

Sondyqtan negizgi tarıfti ulǵaıtpasqa amal qalmady deıdi ol.

— «Vodokanal» mekemesi sý tarıfin ósirip jiberdi. Saıajaılardaǵy sý qubyrlary ábden shirip ketken. Olardy aýystyrý úshin tarıfti kóterip jatyrmyz deıdi. Al bizdiń baǵbanshylyqta búginde qarajat óte tapshy, tipti úıilip qalǵan qoqysty shyǵarýǵa aqsha tappaı otyrmyz. Turǵyndar 1 maýsymǵa deıin saıajaıdy paıdalanǵany úshin tólemderin júrgizýi kerek edi. Alaıda olardyń jartysy da tıisti somany tólemedi, -deıdi ol.

«Entýzıast» baǵbanshylyǵynda 3500 jer telimi bar. Onyń 1500-i ǵana ıgerilgen.

Turǵyndar tarıf bulaısha qymbattaı berse, bul jerde adam qalmaı qala ma dep qorqady.

Al saıajaılardy ustap otyrǵandardyń basym bóligi zeınet jasyndaǵy qala turǵyndary ekeni belgili.

Saıajaı ustaýshylar Pavlodar qalasynyń ákimi Hasar Habylbekovtiń máselege aralasýyn surap otyr.

Eske sala ketkeıik, buǵan deıin Pavlodardaǵy ıesiz saıajaılardy turǵylyqty jeri joq adamdar ıelenip alǵanyn habarlaǵan edik