Pavlodar psıhonevrologııa ortalyǵynda balalardy kópten beri uryp-soǵyp kelgen – prokýratýra

PAVLODAR. KAZINFORM – «Arnaýly áleýmettik qyzmetter kórsetýdiń oblystyq psıhonevrologııalyq balalar ortalyǵy» KMM-de balalarǵa qatigezdikpen qaraý oqıǵalary júıeli túrde jalǵasyp kelgen. Máselen 2020 jyly prokýrorlar atalǵan mekemeden mundaı 17 faktini anyqtaǵan.

Pavlodar oblysynyń prokýratýrasy óńirdegi balalar úıleriniń beınekameralaryn tekserip jatyr. Mundaı mekemelerdiń sany – 10. Prokýrorlar «Arnaýly áleýmettik qyzmetter kórsetýdiń oblystyq psıhonevrologııalyq balalar ortalyǵy» KMM-de kámeletke tolmaǵan jasóspirimderdi uryp-soǵý oqıǵalarynyń júıeli jasalyp kelgenin aıtady.

Buǵan deıin Pavlodar oblysynda múgedektigi bar balalardy uryp-soǵý derekteri anyqtalǵany týraly jazǵanbyz. 

Oblys prokýrorynyń aǵa kómekshisi Ashat Atıkeev atalǵan oqıǵanyń jaı-japsaryn keńirek baıandap berdi. Onyń aıtýynsha, psıhonevrologııalyq balalar ortalyǵynyń beınekameralaryn qaraý kezinde bir tárbıeshi-sanıtardyń eki balany únemi uryp-soǵatyny anyqtalǵan. 

– Bul mekemede densaýlyq jaǵdaıy boıynsha dármensiz jáne psıhonevrologııalyq patologııasy bar, únemi kútimdi qajet etetin balalar emdeledi. Bıylǵy qyrkúıek aıynda mekemedegi 16 jáne 17 jastaǵy eki jasóspirim tárbıeshi tarapynan únemi jazalanyp kelgen. Uıqyǵa jatar kezde olardy uryp-soqqan. Keleńsiz jaǵdaı beınekameraǵa túsip qalǵan. 2020 jyly prokýrorlar atalǵan ortalyqta múgedek balalarǵa qatigezdikpen qaraýdyń 17 faktisin anyqtaǵan edi. Alaıda jaǵdaı qazir de ózgermegeni baıqalady. Bizdiń mamandarymyz qazirgi ýaqytta beınekameralardaǵy jazbalardy qaraýdy jalǵastyrýda. Sońynan qorytyndysy jarııa etiletin bolady, - deıdi A.Atıkeev. 

Jasóspirimdi uryp-soqqan qyzmetker búginde jumystan shettetilgen. Atalǵan ortalyqta búginde 60-qa jýyq bala turaqty em alady. 

Eske sala keteıik, Ekibastuzda eki stýdentti áldebireýler aıaýsyz uryp-soqqan.