Pavlodar polıtsııasy jas anaǵa muz kesegin laqtyrǵan oqıǵaǵa qatysty túsinik berdi
PAVLODAR. KAZINFORM — Júrgizilgen jedel tekserý is-sharalarynyń nátıjesinde polıtsııa qyzmetkerleri muz keseginen jaraqattaný oqıǵasynyń mán-jaıyn anyqtady.
Oqıǵaǵa 12 jasar qyzdyń qatysy bar bolyp shyqty. Ol balkonda turyp muz kesegin syndyrmaq bolǵanda, qolynan abaısyzda shyǵyp ketip tómen qulaǵan.
— Oqıǵaǵa 12 jastaǵy jasóspirim qyzdyń qatysy bary anyqtaldy. Óziniń aıtýynsha, balkonda turyp muz kesegin syndyrmaq bolǵan. Alaıda muz qolynan abaısyzda shyǵyp ketip, tómenge qulap, ótip bara jatqan áıelge tıgen. Oqıǵadan qoryqqan balalar bolǵan jaǵdaı týraly eresekterge aıtpaǵan jáne ata-analarynan jasyrǵan, — dep habarlady óńirlik polıtsııa departamentinen.
Balany tárbıeleý mindetterin tıisinshe oryndamaǵany úshin kámeletke tolmaǵan balanyń zańdy ókilderi ákimshilik jaýapkershilikke tartyldy. Ata-analary bolǵan jaǵdaıdy tolyq moıyndap, ókinish bildirgen.
Tártip saqshylary ata-analardy balalarǵa qaýipsiz júris-turys erejelerin únemi túsindirip, aınaladaǵy adamdardyń ómiri men densaýlyǵyna qaýip tóndirýi múmkin áreketterge jol bermeýge shaqyrady.
Al oblystyq densaýlyq saqtaý basqarmasy zardap shekken ana Pavlodardaǵy № 1 qalalyq aýrýhanada em qabyldap shyqqanyn habarlady. Áıeldiń sol jaq samaıy jaraqattanǵan.
— Jaraǵa bastapqy hırýrgııalyq óńdeý júrgizilip, aseptıkalyq tigister men tańǵysh salyndy. Patsıent neırohırýrgııa bólimshesine jatqyzyldy. Altynshy táýlikte jaǵdaıynyń oń dınamıkasymen úıge shyǵaryldy, — dep málimdedi densaýlyq saqtaý basqarmasynan.
Buǵan deıin Pavlodarda jas anaǵa muz kesegin laqtyryp, basyn jarǵan turǵyn izdestirilip jatqanyn jazǵan edik.
