Pavlodar polıtseıleri sońǵy táýlikte 400-den asa kólikti súıemeldedi

PAVLODAR. KAZINFORM — Aýa raıynyń nasharlaýyna baılanysty sońǵy kúnderi birqatar shekteý engizilip, barlyq kólik túriniń qozǵalysy ýaqytsha toqtatylǵan bolatyn. Tártip saqshylary aqpan aıynda boran jıi soǵatynyn eskertip otyr.

Pavlodar polıtseıleri kesheden beri aq tútek borannan respýblıkalyq joldarda turyp qalǵan 400-den astam avtokólikti qaýipsiz túrde súıemeldeýdi qamtamasyz etti. Іs-sharanyń negizgi maqsaty — jol-kólik oqıǵalarynyń aldyn alý, qozǵalysty retteý jáne azamattardyń ómiri men densaýlyǵyn qorǵaý.

Qysqy kezeńdegi kúrdeli jol jaǵdaıyn eskere otyryp, polıtsııa qyzmetkerleri jol boıyndaǵy tártipti qatań baqylaýda ustap, qozǵalystyń úzdiksiz ári qaýipsiz ótýine jaǵdaı jasady.

— Búgin, joldarda jınalǵan kólikterdi súıemeldeý úshin patrýldik polıtsııa bólimsheleri uıymdastyryldy. Kólikterdi kolonnaǵa jınaǵan ýaqytta polıtseıler júrgizýshilerge kolonnada júrý erejelerin, belgilengen jyldamdyq rejımin jáne araqashyqtyq saqtaýdyń mańyzdylyǵyn túsindiredi. Patrýldik polıtseıler jol boıyndaǵy qaýipsiz qozǵalysty qamtamasyz etýdi jalǵastyrady, — dep habarlady Pavlodar oblysy polıtsııa departamentiniń patrýldik polıtsııa rotasynyń komandıri Áset Ryspaev.

Polıtseıler barlyq júrgizýshini asa saq bolýǵa jáne kólikti aldyn ala daıyndaýǵa shaqyrady. Shınalardyń, tejegish júıesiniń, tehnıkalyq suıyqtyq deńgeıiniń jáne qajetti qysqy jabdyqtardyń jaǵdaıyn tekserý mańyzdy. 

Aldaǵy kúnderi oblys aýmaǵynda aýa raıy nasharlaı túsedi degen boljam bar.

Eske sala keteıik, Qaraǵandy polıtseıleri kúrekpen qum seýip, júzdegen júk kóligine jol ashqany belgili boldy.