Pavlodar polıtsııasy qala syrtynda aıazda tońyp qalǵan otbasyn qutqardy
PAVLODAR. QazaAqparat – Pavlodar oblysynyń polıtseıleri qatty aıazda jol qozǵalysyna qatysýshylarǵa kómek kórsetýdi jalǵastyrýda, dep habarlaıdy QazAqparat tilshisi.
«Tórtinshi qańtar kúni men otbasymmen birge Pavlodar qalasynan Aqtoǵaı aýdanyna jolǵa shyqtym. Alaıda qatty aıazdyń saldarynan kóligimiz synyp qaldy; múldem júrmeı qaldy, al dalada – 40° aıaz. Biraz ýaqyttan keıin tońa bastadyq, tasjolda birde-bir kólik bolmady, eshkim de ótpedi; men otbasym alańdaı bastadym, ábúıir bolǵanda polıtsııa qyzmetkerleri der kezinde keldi, – dep jazdy Pavlodar oblysy Aqtoǵaı aýdanynyń turǵyny Andreı Sýprýn polıtsııa qyzmetkerlerine alǵys hatynda. – Bul quramynda Erbolat Jelkaıdarov pen Nursultan Ahmetjanov bar Pavlodar oblysynyń patrýldik polıtsııasy rotasynyń 0061 nómirli ekıpajy boldy. Balalar toqtap, ystyq shaı berdi, mashınamyzdy Aqtoǵaı aýdanyna deıin súırep apardy».
Onyń aıtýynsha, polıtsııa olardy úıge deıin jetkizgen. Ol tártip saqshylarynyń ótip ketpeı kómekteskeni úshin, otbasyn sýyqta qaldyrmaǵany úshin alǵysyn jetkizdi.
Sondaı-aq quqyq qorǵaý organdarynyń qyzmetkerlerine jumysta sáttilik tiledi.
Polıtseıler óz kezeginde jolda qalǵan júrgizýshiler men olardyń jolaýshylaryna kómek kórsetý olardyń mindeti ekenin atap ótti.
«Pavlodar oblysynyń polıtsııa departamenti alys jolǵa shyqpaýǵa jáne aýa raıy men tasjoldyń jaı-kúıi týraly habarlamalarǵa qulaq asýǵa keńes beredi. Jolda qıyn jaǵdaıǵa tap bolǵan jol qozǵalysynyń barlyq qatysýshylary táýlik boıy 102 nómiri boıynsha ishki ister organdarynyń bólimshelerinen kómek suraı alady» dep tolyqtyrdy óńirlik polıtsııa departamenti.
