Pavlodar-Nur-Sultan baǵytyndaǵy joldy patrýldeý qyzmetinde júrgen quqyq qorǵaýshylar jol shetinde turǵan avtobýsty kórip qalǵan. Jolda qalǵan avtobýstyń artqy dóńgeleginiń kúpshegi (stýpıtsa) synyp qalǵan kórinedi. Jolaýshylardyń bári de Ózbekstan Respýblıkasynyń azamattary. Reıstik avtobýs Reseıden Ózbekstanǵa baǵyt alyp bara jatqan.

«Kólik quralynyń buzylyp qalýyna baılanysty jolaýshylar birneshe saǵat jolda qalýǵa májbúr bolǵan. Sýyq salonda tońyp qalǵandar boldy. Polıtsııa qyzmetkerleri adamdar jylynyp alý úshin olardy taıaýdaǵy kempıngke jetkizdi. Buǵan qosa tártip saqshylary avtobýsty jóndeýge kómektesti. Kelesi kúni túste ǵana kólik jóndeldi. Jolaýshylardyń bárine Aqsý qalasy polıtsııasynyń Qalqaman bóliminde ystyq shaı men baýyrsaq, tamaq berildi», - dep habarlaıdy ІІM-nen.

Keterde ózbekstandyq jolaýshylar pavlodardyq polıtsııa qyzmetkerlerine kómegi úshin alǵys bildirip, qyzmette tabys tiledi.

Budan buryn pavlodarlyq tártip saqshylary Reseıden Qyrǵyz Respýblıkasyna bara jatqan 53 jolaýshyǵa kómek qolyn sozǵan. Taǵy birde jolda tońyp qalǵan Tájikstan azamattaryna da kómek kórsetken.