Pavlodar polıtseıleri áleýmettik jeli qoldanýshylary arqyly zań buzýshyny qolǵa túsirdi
ASTANA. QazAqparat - Pavlodar oblysynda 1 tamyz kúni belgisiz bireý avtokólikpen jaıaý júrginshini qaǵyp ketken. Zardap shekken adamdy júrgizýshi kóligine otyrǵyzyp oqıǵa ornynan izin sýytqan. Tek jergilikti áleýmettik jeli qoldanýshylary arqyly ІІD qyzmekterleri zań buzýshyny qolǵa túsirdi, dep habarlaıdy «QazAqparat» HAA tilshisi.
Oqıǵa 1 tamyz kúni keshki saǵat 21:00-der shamasynda Pavlodar qalasynyń Gagarın-Qamzın kóshesiniń qıylysynda tirkelgen. Ótip bara jatqandar jaıaý júrginshini qaǵyp ketken «Lada prıora» kóliginiń nómirin este saqtap, áleýmettik jelilerge aqparat taratqan.
Budan habardar bolǵan Pavlodar oblysynyń ІІD qyzmetkerleri aýrýhanalardy tekserip, zardap shekken adamdy tappapty. Aqyry, kóp ótpeı zań buzýshynyń kim ekeni anyqtalǵan.
«Instagram» áleýmettik paraqshalarynda Qamzın-Gagarın kósheleriniń qıylysynda bolǵan jol kólik apaty faktisi jarııalanǵan beınejazba boıynsha polıtseıler 32 jastaǵy avtokóliktiń júrgizýshisin jáne 37 jasar jaıaý júrginshi anyqtady. Júrgizýshi QR ÁQBK 600-baby, 1-tarmaǵy boıynsha 10 AEK mólsherinde ákimshilik jaýapqa tartyldy», - dep habarlaıdy Pavlodar oblysynyń ІІD baspasóz qyzmeti.
Oblystyq ishki ister departamenti jol-kólik apaty týraly habarlaǵan jáne beınematerıldy joldaǵan azamattarǵa alǵysyn bildiredi.
