Pavlodar pedagogıkalyq ınstıtýtynyń ǵalymdary halyqaralyq jazǵy ǵylymı mektep jumysyna qatysýda
PAVLODAR. 22 tamyz. QazAqparat - Pavlodar pedagogıkalyq ınstıtýtynyń bıologtary Ermek Ǵabdýllın, Jarqyn Qabdolov jáne Aısulý Taılaqova «Epıdemıologııa, epızootologııa, jabaıy qustar tasymaldaıtyn ınfektsııalardyń jedel dıagnostıkasy» halyqaralyq jastar ǵylymı mektebiniń jumysyna qatysýda, dep habarlady JOO-nyń baspasóz qyzmetinen.
Jas ǵalymdarǵa arnalǵan jazǵy mektep 21 tamyzdan bastap Novosibir memlekettik ýnıversıtetinde ótkizilýde. Munda Italııa, AQSh, Japonııa, Qytaı, Abhazııa, Qazaqstan jáne Reseıden kelgen 80-nen astam zertteýshi jınaldy.
Jas bıologtarǵa Eýrazııanyń ornıtofaýnasy men qustar mıgratsııasyn zertteýdegi ǵylymı jáne ádistemelik jetistikter týraly aıtyp beredi. Olar vırýsologııa, molekýlalyq epıdemıologııa jáne epızootologııa, qustardyń vırýstyq jáne bakterııalyq aýrýlarynyń tájirıbelik dıagnostıkasymen tanysady.
Sabaqtardyń negizgi bóligi Novosibir oblysyndaǵy Chan kólinde Janýarlardy toptastyrý jáne ekologııa ınstıtýty ǵylymı ornıentologııalyq statsıonarynyń dalalyq jaǵdaıynda ótedi.
