Pavlodar ormanshylary jabaıy janýarlarǵa tonnalaǵan azyq shashyp jatyr
PAVLODAR. KAZINFORM — Pavlodar orman jáne janýarlar dúnıesin qorǵaý mekemesiniń qyzmetkerleri aıazdy kúnderi orman janýarlaryn azyqtandyrýmen shuǵyldanyp jatyr. Qazirgi ýaqytta mekemege qarasty aýmaqta 80 ottyq pen tuz astaýlary qurylǵan.
Atalǵan uıymǵa qarasty 6 ormanshylyq bar. Inspektorlar jabaıy janýarlarǵa ǵana emes, qustar men balyqtarǵa da qamqorlyq jasaıdy.
– Ertis ózeniniń jaıylmalarynda jem-shóp pen tuz salatyn ottyqtar qurylǵan. Inspektorlardyń kúshimen shamamen 80 azyq orny, qustarǵa arnap 40 úıshik jasaldy. Janýarlardy azyqtandyrý úshin 3,5 tonnadan astam shóp pen dándi daqyl jarmalary, 180 kılogram tuz daıyndalǵan edi. Ormanshylar solardy belgilengen jerlerge jetkizip, seýip jatyr, — dep habarlady Kazinform tilshisine Pavlodar orman jáne janýarlar dúnıesin qorǵaý mekemesiniń basshysy Ajdar Júsipov.
Balyqtar da ormanshylardyń qamqorlyǵynda. Shaǵyn sý qoımalaryndaǵy balyqtardy ottegimen qamtamasyz etý úshin ınspektorlar aeratsııa júrgizedi. Oıyqtar burǵylap, oǵan qamys qoıady. Osyndaı qarapaıym ádis arqyly sýǵa ottegi aralasady.
— Sý aıdyndaryndaǵy muzdyń qalyńdyǵy búginde 40 santımetrge jetip tur. Mundaı qalyńdyqtaǵy muz ottegini ótkizbeıdi. Saldarynan sý astyndaǵy janýarlar álemi qysta qyrylyp qalýy yqtımal. Aeratsııalyq tásil arqyly kóptegen sý aıdynyndaǵy balyq sharýashylyǵyn aman saqtap otyrmyz, — dep qosty Ajdar Júsipov.
Bıyl qysta elikter Pavlodar qalasyna jıi kirip júr. Ózen mańaıyndaǵy jaıylmalardy mekendeıtin janýarlar keıbir sátte qala kóshelerin kezip, azyq izdeıtinge uqsaıdy. Ormandy jerlerdiń kóbinde qar qalyń, elikterdiń tebindep jaıylýyna qıyndyq týdyryp tur.
Buǵan deıin Ertis ormanynda emin-erkin jaıylyp júrgen elikter kózge túskenin jazǵanbyz.
Al Baıanaýylda qalyń qarǵa ombyqqan bulan beınetaspaǵa túsip qaldy.