Pavlodar ormandaryna órt qaýpi tónip tur – Vladımır Bekker
NUR-SULTAN. QazAqparat - Qazaqstannyń 4 oblysynda joǵary klasty órt qaýpi týyndaǵan, dep habarlaıdy QazAqparat tilshisi.
QR ІІM Tótenshe jaǵdaılar komıtetiniń tóraǵasy Vladımır Bekkerdiń aıtýynsha, shildeniń shilińgir ystyǵy orman alqaptarynda órt qaýpin kúsheıtip otyr.
«Sońǵy aptap ystyqtarǵa baılanysty elimizdiń 4 oblysynda joǵary klasty órt qaýpi týyndap tur. Atap aıtsaq, Aqmola, Shyǵys Qazaqstan, Qostanaı obystarynda órt qaýpiniń joǵary klasy tirkeldi. Al Pavlodar oblysynda orman alqaptaryna órt qaýpiniń besinshi kezeńi anyqtaldy. Ony órt qaýpiniń «tótenshe klasy» dep te aıtady. Keshe ǵana atalmysh óńirde 2 orman órti tirkeldi. Munda negizinen qylqan japyraqty orman shoǵyrlanǵan», - dedi komıtet tóraǵasy.
Vladımır Bekkerdiń aıtýynsha, jyl basynan beri el aýmaǵynda 296 orman órti, 12 dala órti tirkelgen. Saldarynan jalpy aýmaǵy 38 myń gektar alqap otqa oranǵan.
«Túrkistan jáne Jambyl oblystarynda 9 dala órti egis alqaptaryn sharpydy. Barlyq egis alqaptarynyń ıesin osyndaı tosyn oqıǵanyń aldyn alý boıynsha keshendi sharalar qabyldaýǵa shaqyramyz. Tym bolmaǵanda egis alqabynyń syrtynan 4 metr endikte jer jyrtylǵan bolýy tıis. Osyndaı saqtyq sharalary saqtalmaýy saldarynan 492 gektar egin kúlge aınaldy», - dedi ol.
Vladımır Bekker aptap ystyqta ormanǵa aýa temperatýrasymen qosa jańbyrsyz naızaǵaıdyń kóp qaýip tóndiretinin aıtady.
«Byltyrǵy kezeńmen salystyrǵanda orman órti 67 paıyzǵa kóp. Buǵan bıyl kóktemniń byltyrǵydan eki apta buryn shyqqany da sebep bolyp tur. Sońǵy aptada 20-ǵa jýyq orman órti sóndirildi. Negizgi sebep – naızaǵaı. Muny bizde «qurǵaq naızaǵaı» dep ataıdy. Meniń óz tájirıbemde osyndaı jańbyrsyz naızaǵaıdyń saldarynan bir orman sharýashylyǵynda 21 órt tirkelgen kez boldy. 2002 jyly Shyǵys Qazaqstanda jumys istep júrgende bolǵan oqıǵa bul. Al bıyl Pavlodar oblysynda bir ýaqytta bir alqapta 3 jerden órt shyqty. Abyroı bolǵanda, der kezinde óshirildi. Órt aýmaǵy bir gektarǵa da jetpedi», - dedi komıtet tóraǵasy.
Eske salsaq, QR ІІM Tótenshe jaǵdaılar komıtetiniń tóraǵasy Vladımır Bekker arnaıy brıfıngte ótken senbi men jeksenbide 22 adamnyń sýǵan ketkenin aıtqan bolatyn.
