Pavlodar ormandarynda órtke qarsy baqylaýǵa drondar jumyldyryldy
PAVLODAR. KAZINFORM — 6 sáýirden bastap óńirlik orman qory aýmaǵynda órt qaýipti kezeń jarııalandy. Orman alqaptarynda 41 beınebaqylaý kamerasy ortaq júıege biriktirilgen.
Oblystyq tótenshe jaǵdaılar departamenti bastyǵynyń orynbasary Qaırat Shaımardenovtiń aıtýynsha, tabıǵı órtterdi jedel anyqtaý úshin pavlodarlyq órt sóndirýshiler 8 ushqyshsyz ushý apparatyn iske qosqan. Drondar ótken jyly monıtorıng júrgizýde de, órtti sóndirý jumystary kezinde de óz tıimdiligin dáleldegen.
— Biz kún saıyn orman alqaptaryna ǵaryshtyq jáne beınemonıtorıng júrgizemiz. Kezekshi bólim júıesine «Ertis ormany» rezervaty men Pavlodar orman mekemesinen 41 beınebaqylaý kamerasy biriktirilgen. Bul tájirıbe tabıǵı órtterdi tek bizdiń aýmaqta ǵana emes, sonymen qatar Qazaqstannyń kórshiles oblystary men Reseı Federatsııasynyń aýmaqtarynda da erte satyda anyqtaýǵa septigin tıgizetinin kórsetti. Qazirgi ýaqytta Baıanaýyl ulttyq tabıǵı parkinde taǵy segiz kamerany biriktirý jumystary júrgizilip jatyr, bul bizdiń baqylaý aımaǵymyzdy keńeıtýge múmkindik beredi, — deıdi ol.
Pavlodar oblysynyń aýmaǵyndaǵy órt qaýipti maýsymyna «Qazavıaqutqarý» mekemesi de jaýapty. Baıanaýyl aýdanynyń aýmaǵynda avıatsııalyq patrýldeý júrgizý úshin 230 ushý saǵaty bekitildi, Pavlodar bólimshesindegi ushý ýaqyty — 460 saǵat.
Buǵan deıin ormanshylarǵa haı-tek stılinde jańa úıler salynatynyn jazǵanbyz.