Pavlodar ormandaryna órtten 6 mln teńgege jýyq shyǵyn kelgen
PAVLODAR. KAZINFORM — Mamandar orman órtterine kóbine fermerler men jeke azamattardyń jaýapsyzdyǵy sebep ekenin aıtady. Jyl basynan 250-den astam adam ákimshilik jaýaptylyqqa tartylǵan.
Pavlodar oblysyndaǵy orman órtterinen keltirilgen shyǵyn qazirdiń ózinde 5 mln 904 myń teńgege baǵalanyp otyr. Shyǵyn kólemi ótken jylǵy órt qaýpi bar kezeńmen salystyrǵanda kóp. Byltyr jalpy shyǵyn 5,8 mln teńgege bolǵan edi.
Óńirlik tótenshe jaǵdaılar departamenti bastyǵynyń orynbasary Qaırat Shaımardenovtiń aıtýynsha aımaqta tabıǵı órtterdiń aldyn alý jáne joıý úshin departament, jergilikti atqarýshy organdar men orman sharýashylyǵy mekemeleriniń kúshteri jumyldyrylǵan. Sonymen qatar reıdter júrgizetin 49 mobıldi top qurylǵan.
— Kóktemnen beri mamandar 1,5 myńnan astam tekseris júrgizip, 250-den astam adamdy ákimshilik jaýaptylyqqa tartty. Aıyppuldardyń jalpy somasy 1,5 mln teńgeden asty. Mamandarymyz shóp shabý naýqanyna da erekshe kóńil bólip otyr. Shóp shabý bastalǵaly beri kóliktegi órt qaýipsizdigi erejelerin buzǵany úshin 24 adam jazalandy. Aıyppul somasy 248 myń teńgeni qurady, — dep habarlady departament ókili.
Taǵy bir ózekti másele — qatty turmystyq qaldyqtar polıgondaryndaǵy órtter. Órt qaýpi bar kezeń bastalǵaly mundaı 27 jaǵdaı tirkeldi. Tórt órt deregi boıynsha tótenshe jaǵdaılar departamenti ákimshilik hattama toltyrǵan. Al 23 jaǵdaı boıynsha materıaldar Ekologııa departamentine jiberilgen.
Buǵan deıin Ertis-Baıan óńirinde orman órtteri 25%-ǵa kóbeıgenin jazǵanbyz.
