Pavlodar óńiri aýmaǵynyń 80 paıyzynda áli qar jatyr
PAVLODAR. KAZINFORM — Pavlodar óńiriniń 80 paıyzynda qar jamylǵysy saqtalyp tur. Qar jamylǵysynyń bıiktigi ońtústik aýmaqtarda 3-8 santımetr bolsa, ortalyq jáne shyǵys bóliginde 30 santımetrge deıin jetedi.
Óńirlik tótenshe jaǵdaılar departamentiniń málimetinshe, temperatýranyń kóterilýine jáne qardyń jyldam erýine baılanysty Baıanaýyl aýdanyndaǵy Kókdombaq aýylyna kireberis jol baqylaýǵa alynǵan. Jol boıymen kólikter ótip jatyr, eldi mekenderge qaýip tóngen joq. 7 sý ótkizgish qubyr jumys istep tur. Sondaı-aq oblystyń kóptegen eldi mekeninde sýdy jyrý, sorý jumystary jalǵasyp jatyr.
— Oblysqa qarasty jerlerdiń 80 paıyzynda qar jamylǵysy áli de saqtalyp otyr. Jergilikti atqarýshy organdar qar shyǵarýdy jalǵastyryp jatyr. Qazirdiń ózinde 2 mln tekshe metrden astam qar shyǵaryldy. 63 myńnan astam qap daıyndaldy. 1281 sý ótkizgish tolyǵymen tazartyldy. Sileti sý qoımasynda Aqmola, Pavlodar jáne Soltústik Qazaqstan oblystary tótenshe jaǵdaılar departamentteriniń qatysýymen jıyn ótti. Sý tasqyny jaǵdaıyn baǵalaý úshin Sileti ózeniniń arnasyna aerovızýaldy baqylaý júrgizildi. Mamandar arnanyń jaı-kúıin taldap, qaýipti ýchaskeler men muz keptelisiniń yqtımal aımaqtaryn anyqtady. Sondaı-aq qosymsha den qoıý is-sharalaryn ázirledi, — dep habarlady departamentten.
Eske sala keteıik, Sileti ózeninde muz jarý jumystary júrgizildi.