Pavlodar óńirindegi oqýshylar mı batpaqtan aýyl ishindegi mektepke jete almaı júr
PAVLODAR. KAZINFORM — Jańabet aýyly turǵyndarynyń aıtýynsha, kóshe joldaryn retke keltirý máselesi kóp jyldan beri kóterilip keledi. Alaıda jergilikti bılik aýyldyń muńyn elemeı otyr.
Turǵyndar jbergen vıdeodan baıqaǵanymyzdaı, Aqtoǵaı aýdany Jańabet aýylynyń kósheleri kúzdiń jaýynynda mı batpaqqa aınalyp ketken. Adam túgili, kólik áreń qozǵalady. Keıbireýler balalaryn mektepke traktormen tasyp júr. Mundaı mashaqat jazǵyturym qar erigennen bastap aıaz túskenshe sozylatyn kórinedi. Jyl saıyn qaıtalanatyn keleńsiz jaǵdaı ákimderdiń eseptik kezdesýlerinde aıtyla-aıtyla jaýyr bolǵan. Ýádelerin oryndamaıtyn bılik ókilderine jurttyń ókpesi qara qazandaı.
— Mynaý kóshe degeniń aty ǵana, áıtpese naǵyz taıganyń mı batpaǵy tárizdi. Júrseń aıaǵyńa jabysyp, shalynyp qulaısyń. Kóktem men kúzde, jazdyń jańbyrly kúnderi ezilip ketetini sonshalyq, aýyl ishinde kólikpen ǵana júrýge májbúr bolamyz. Bárinen buryn balalarymyzǵa qıyn boldy. Mektepke baryp, kelý naǵyz mashaqat. Keıbir kórshilerim balalaryn tańerteń kólik jaldap aparady, — dep qynjyldy aýyl turǵyny Azamat Qojmaǵambetov.
Al Jańatap bólimshesinen oqýshylar ákeletin avtobýs bul jerge kele almaıdy, úlken kólik batyp qalýy yqtımal. Amalsyzdan aýyl syrtynan toqtap, balalar batpaq keship jetedi. Batpaq máselesi Jańatap aýylynda da bar, avtobýs munda da alystan aıaldaıdy. Sonyń saldarynan birneshe ata-ana balalaryn mektepke jiberýden bas tartqan.
Osy oraıda, turǵyndar tym bolmaǵanda kóshe joldaryna ýaqytsha qıyrshyq tas tósep berse eken degen tilekterin jetkizdi. Joldardyń jalpy uzyndyǵy 2 shaqyrymnan aspaıdy. Budan birer jyl buryn aýyl azamattary bas qosyp, kóshelerdiń jolyna topyraq tógip, óz qoldarymen bıiktetken eken. Alaıda qıyrshyq tas bolmaǵan soń álgi jasaǵandary bir jylǵa jetpeı buzylyp qalǵan. Keıde jerdiń ezilip ketetini sonshalyq, aýylǵa kólik kire almaı úlken joldyń boıyna qańtaryp qoıady. Kireberis jol da jóndeýge suranyp tur.
Anyqtaǵanymyzdaı, Jańabet aýylyndaǵy turǵyndar sany 300-diń ústinde. Mektepte 71 bala oqıdy. Mútkenov aýyldyq okrýgine qaraıtyn eldi mekenniń adamdary ózderin shette qalǵan aral turǵyndary retinde sezinetinderin aıtady. Sebebi, aýyl ıgiligi úshin jasalǵan jumystar joqtyń qasy. Halyqtyń birligi aırandaı uıyǵanymen, aýyl tirligin jandandyra túsetin, jastardyń turaqtap qalýyna negiz bolatyn memlekettik qoldaýdy sezine almaı otyr.
Al Aqtoǵaı aýdanynyń bıligi Jańabetke asfalt turmaq, qıyrshyq tas tóseýdiń ózi ázirshe múmkin emes deıdi. Eń áýeli jobalyq-smetalyq qujattama (JSQ) ázirlenip, sonyń qorytyndysy boıynsha jóndeý jumystaryna konkýrs jarııalanýy kerek. Al máseleni bir demde sheship bere salatyn demeýshi jomart kásipkerler tabylmaı otyrǵan kórinedi.
— Jańabettegi másele bizge jaqsy málim. Biraq osy ýaqytqa deıin kóshe joldaryn jóndeý boıynsha joba ázirlenbegen. Sol sebepti oǵan ázirshe qarajat bólý, ýaqytsha shara retinde qıyrshyq tas tóseý de múmkin emes. Qazirgi ýaqytta aýyldyń ortalyq jáne mektep ornalasqan qos kóshesine, 500 metrlik kireberis jolǵa asfalt tóseý boıynsha JSQ ázirleýge usynystar jasaldy, ol keler jyldyń bıýdjetine engiziledi. Bıýdjette qaralmaǵan soń ondaı múmkindik jasaı almaımyz. Jospar boıynsha 2026 jyly JSQ ázirlense, 2027 jyly asfalt tóselýi kerek. Kóshelerge tek asfalt tóselmeıdi, onyń tabandary nyǵyzdalyp, sý shaıyp ketpeıtindeı berik etip jasalýy tıis, — dep jaýap berdi aýdandyq ákimdikten.
Jalpy óńir jurtynyń aıtýynsha, mundaı másele Ertis boıyn qonys etken kóptegen aýyldarda bar. Alaıda kóp jyldar boıy qordalanǵan másele sheshiler emes.
Eske sala keteıik, Pavlodar oblysynda 500-ge jýyq synyptyń oqýshylary qashyqtan bilim alyp jatyr.