Pavlodar óńirindegi aýyldarda aýyzsý synamalarynyń 150-den astamy talapqa bolmaı shyqty
PAVLODAR. KAZINFORM - Pavlodar oblysynda jyl basynan beri aýyzsýmen jabdyqtaý júıelerinen alynǵan 3 790 synama zerthanalyq tekserýden ótken. Onyń 4,1 paıyzynan sanıtarııalyq talaptarǵa sáıkes kelmeıtin kórsetkishter anyqtalǵan.
Óńirlik sanıtarııalyq-epıdemıologııalyq baqylaý departamentiniń basshysy Batyrbek Álıevtiń aıtýynsha, ásirese, Aqsý men Ekibastuz qalalarynyń aýyldyq aımaqtarynda, sondaı-aq tórt aýdanda aýyzsý sapasyna qatysty máseleler bar.
- Sanıtarııalyq-epıdemıologııalyq baqylaý organdary jyl basynan aýyzsý sapasyna monıtorıng júrgizdi. Zertteý barysynda sý synamalary sanıtarııalyq-hımııalyq, mıkrobıologııalyq jáne parazıtologııalyq kórsetkishter boıynsha tekserildi. 3 790 synama alynyp, zerthanalyq taldaý nátıjesinde olardyń 4,1 paıyzynda (150-den astam jaǵdaı) mıkrobıologııalyq jáne sanıtarııalyq-hımııalyq kórsetkishter boıynsha gıgıenalyq normatıvterge sáıkes kelmeý derekteri tirkeldi, - dep habarlady Kazinform tilshisine Batyrbek Álıev.
Mamandardyń dereginshe, aýyzsýdyń sapasyna qatysty aýytqýlar kóbine organoleptıkalyq kórsetkishterden, temir mólsherinen, jalpy kermektilikten, qurǵaq qaldyq pen hlorıdter quramynan baıqalǵan. Aýyzsý sapasynyń eń tómen kórsetkishteri Aqsý qalasynyń aýyldyq aımaǵynda, Ekibastuz qalasynyń aýyldyq aımaǵynda, Tereńkól, Aqqýly, Aqtoǵaı jáne Maı aýdandarynda tirkelgen. Atalǵan aýmaqtarda talapqa sáıkes kelmeıtin synamalar úlesi oblystyq kórsetkishten joǵary bolǵan.
- Anyqtalǵan kemshilikterge baılanysty jergilikti atqarýshy organdar habardar etilip, aýyzsýmen jabdyqtaý nysandaryn paıdalanýshy uıymdarǵa tıisti usynymdar berildi. Nátıjesinde uıymdar tehnologııalyq jabdyqtardy tekserip, retteý, súzgilerdi aýystyrý, sý qubyrlary men qurylystaryn tazalaý, shaıý jáne dezınfektsııalaý jumystaryn júrgizgen. Qaıtalama monıtorıng qorytyndysy boıynsha aýyzsý synamalarynyń kórsetkishteri gıgıenalyq normatıvterge sáıkes keldi, - dep qosty óńirdiń bas memlekettik sanıtarııalyq dárigeri.
Qoldanystaǵy zańnamaǵa sáıkes aýyzsýmen jabdyqtaý nysandaryn paıdalanatyn uıymdar aýyzsýdyń sapasy men qaýipsizdigine turaqty óndiristik baqylaý júrgizýge mindetti. Bul jumys sý alý oryndarynda, sýdy taratý jelisine berer aldynda jáne ishki-syrtqy sý taratý jelilerinde júzege asyrylýy tıis.
Sanıtarııalyq baqylaý mamandary sapasyz sýdy uzaq ýaqyt tutyný adam densaýlyǵyna keri áser etýi múmkin ekenin eskertedi. Ásirese, quramynda hımııalyq zattar men aýyr metaldar mólsheri joǵary sýdy paıdalaný asqazan-ishek joldary, baýyr men búırek qyzmetiniń buzylýyna yqpal etedi. Al mıkrobıologııalyq lastanǵan sý jiti ishek ınfektsııalary, A vırýstyq gepatıti, rotavırýstyq jáne parazıttik aýrýlardyń taralý qaýpin arttyrady.
Osyǵan baılanysty mamandar aýyldyq eldi mekenderdi sapaly aýyzsýmen qamtamasyz etý, sý júıelerin tıisti deńgeıde paıdalaný jáne zerthanalyq baqylaýdy júıeli júrgizý qajettigin aıtady.
Buǵan deıin Pavlodar oblysynda aýyzsýdyń baǵasy qansha qansha turatynyn jazǵanbyz.
