Pavlodar óńirinde joıqyn quıyn qaıtalanýy múmkin - TJD
PAVLODAR. KAZINFORM - Tótenshe jaǵdaı qyzmeti aldaǵy kúnderi Pavlodar oblysynyń aýmaǵynda ekpindi jel soǵyp, burshaq aralas qatty jańbyr jaýatynyn eskertti. Keı jerlerde joıqyn quıyndar paıda bolýy yqtımal.
Buǵan deıin oblystyń Ýspen aýdanyndaǵy Qońyrózek aýylyn jaıpap ótken tornado tektes quıyn aldaǵy kúnderi oblys aýmaǵynda taǵy da júrýi múmkin.
- Aýa raıyn boljaýshylardyń boljamyna sáıkes, óńirde qatty jáne ekpindi jel, naızaǵaı, burshaq, sondaı-aq jergilikti quıyndardyń (smerchterdiń) paıda bolýy múmkin. Osyǵan oraı turǵyndardyń abaı bolýyn, qaýipsizdik sharalaryn saqtaýyn suraımyz, - dep habarlady óńirlik tótenshe jaǵdaılar departamentinen.
Mamandar adamdarǵa múmkindiginshe úıden shyqpaı, terezeler men esikterdi, balkondardy myqtap bekitýdi eskertip otyr.
- Jel soqqan ýaqytta aǵashtardyń astynda panalamaǵan abzal. Elektr berý jelileriniń, jarnamalyq qalqandardyń, aıaldamalardyń jáne basqa da turaqsyz qurylymdardyń janynda turmańyz. Avtokólikterdi de álgindeı nysandardyń mańyna qoımańyzdar. Múmkindiginshe eldi mekennen tys jerlerge shyǵýdy shekteńizder, - dep qosty departamentten.
Eske sala keteıik, buǵan deıin Pavlodar oblysynda daýyldan 49 turǵyn úı búlindi.
