Pavlodar óńirinde jol apatynan bir bala qaza taýyp, úsheýi zardap shekti
PAVLODAR. KAZINFORM - Jol apaty Pavlodar-Astana avtojolynyń Dostyq aýyly mańynda bolǵan. Ókinishke qaraı, jedel járdem brıgadasy qyz balanyń ómirin saqtap qala almady.
Jedel járdemge shaqyrtý 14 tamyz kúni keshki saǵat 5-terde túsken. Oqıǵa ornyna jedel járdemniń úsh brıgadasy, Apattar medıtsınasy ortalyǵynyń brıgadasy jáne Qalqamandaǵy dárigerlik ambýlatorııanyń medıtsına qyzmetkerleri barǵan.
– Jol apaty bolǵan jerden eki ul men bir qyz bala oblystyq balalar aýrýhanasyna jetkizildi. Taǵy bir áıel kámeletke tolmaǵandardyń birine serik bolyp bardy. Pavlodar qalalyq №1 aýrýhanasyna bir er adam men áıel jetkizildi. Oqıǵa kezinde kámelet jasyna tolmaǵan qyz bala asa aýyr jaraqattar alǵan. Dárigerler zardap shegýshini jedel járdem kóliginde klınıkalyq ólim jaǵdaıynda qabyldady. Reanımatsııalyq kómek kórsetýge tyrysqanymen, ómirin saqtap qalý múmkin bolmady, - dep habarlady óńirlik jedel járdem stantsııasynan.
Buǵan qosa 16 tamyz kúni Tobyljan aýylynyń janynda kólik jol jıegine aýdarylyp, saldaynan úsh er adam aýdandyq aýrýhanaǵa jatqyzylǵan. Sondaı-aq, jiti stresstik reaktsııa alǵan boıjetkenge oqıǵa ornynda kómek kórsetilgen.
Eske sala keteıik, Astana – Şýchınsk tasjolynda júrgizýshi uıyqtap ketip, jol apatyna tústi.
