Pavlodar óńirinde jyl basynan 118 zańsyz qoqys orny anyqtalǵan
PAVLODAR. KAZINFORM - Onyń 112-si qazirgi ýaqytta joıylǵan. Zańsyz qoqys úıindilerin anyqtaýda «Qazaqstan Ǵarysh Sapary» geoportalynyń ǵaryshtyq monıtorıngi qoldanylady.
Pavlodar oblysy ekologııa departamenti basshysynyń orynbasary Áset Syzdyqovtyń aıtýynsha, bıyl aımaqta 118 zańsyz qoqys orny anyqtalǵan. Olardyń tórteýin mamandar teksere barǵanda qoqys orny rastalmaǵan. Al taǵy ekeýi jeke menshik aýmaqa ornalasqany belgili bolǵan. Ózgeleri tolyqtaı joıylǵan.
– Jalpy, departamentke qaldyqtardy zańsyz ornalastyrý arqyly ekologııalyq zańnama talaptaryn buzý derekteri boıynsha 14 materıal tústi. Olardy qaraý nátıjesinde 13 adam ákimshilik jaýapkershilikke tartyldy, – deıdi Áset Syzdyqov.
Qazirgi ýaqytta Pavlodar oblysynda turmystyq qatty qaldyqtardy ornalastyrýǵa arnalǵan 321 nysan bar. Alaıda olardyń tek úsheýi ǵana ekologııalyq jáne sanıtarııalyq zańnama talaptaryna sáıkes keledi. Olar Pavlodar, Ekibastuz jáne Aqsý qalalarynda ornalasqan.
Qaldyqtardy basqarý ınfraqurylymyn jaqsartý maqsatynda birqatar aýdanda zamanaýı polıgondar salý josparlanyp otyr. Atap aıtqanda, Ertis, Tereńkól, Maıqaıyń jáne Baıanaýyl eldi mekenderinde turmystyq qatty qaldyqtar polıgondaryn salýǵa arnalǵan jobalyq-smetalyq qujattama ázirlengen.
Budan bólek, Sharbaqty, Jelezın, Maı, Aqtoǵaı jáne Ýspen aýdandarynda da osyndaı jobalardy iske asyrý kózdelgen.
Eske sala keteıik, qoqysty qaıta óńdeý jobalaryna bólinetin qarjy 385 mlrd teńgege deıin ulǵaıtylmaq.