Pavlodar óńirinde jeti eldi mekenge jańa avtobýs baǵyttary ashylady
PAVLODAR. KAZINFORM - Oblys ákimdiginiń málimetinshe, búginde aımaqtaǵy 345 eldi mekenniń 299-y nemese 87- %-y avtobýs qatynasymen qamtylǵan.
Aldaǵy ýaqytta taǵy bir oblysaralyq, úsh oblysishilik jáne úsh aýdanishilik baǵyt ashý josparlanǵan.
Jańa baǵyttardyń qatarynda Pavlodar – Kýrchatov, Galıtskoe – Pavlodar, Galkın – Pavlodar jáne Konstantınovka – Pavlodar baǵyttary bar. Budan bólek, Jumat Shanın men Baıanaýyl, Lesnoe men Jelezınka, Qaraaǵash pen Ertis eldi mekenderin avtobýs qatynasymen baılanystyrý kózdelgen.
Budan bólek, Pavlodar men Aqsýda avtobýstardyń naqty júrgen jolyn esepke alýǵa múmkindik beretin «Bas-kılometr» júıesi engizilgen. Bul tetik qoǵamdyq kóliktiń kestege saı qozǵalýyn baqylaýǵa jáne sýbsıdııa bólý úderisiniń ashyqtyǵyn arttyrýǵa baǵyttalǵan.
Óńirde tramvaı qatynasyn damytýǵa da basymdyq berilip otyr. Qazir kún saıyn jelige 112 vagon shyǵady. Onyń 40-y – jańa tramvaı. Bıyl birinshi jartyjyldyqta jergilikti bıýdjet esebinen energııany únemdeıtin 10 vagon satyp alynǵan.
Eske sala keteıik, Pavlodar bıligi tramvaı parkin jańartýǵa 48,9 mlrd teńge baǵyttamaqshy.