Astanalyq sportshylar Azııa chempıonatynda 2 altyn medal ıelendi
ASTANA. KAZINFORM — Qyrǵyzstannyń Bishkek qalasynda kórkem gımnastıkadan ótken Azııa chempıonaty elordalyq sportshylar úshin jarqyn nátıjelerge toly boldy. Bul týraly Astana qalasynyń ákimdigi málim etti.
Birneshe kúnge sozylǵan qurlyq dodasynda astanalyq sportshylar jekeleı jáne toptyq baǵdarlamalarda joǵary deńgeıde óner kórsetip, Qazaqstan qorjynyna 15 medal saldy.
Chempıonattyń alǵashqy kúninde komandalyq kópsaıysta birden eki kúmis medal enshilendi. №1 Senıorlar quramasy 263,65 upaı jınap, kúmis júldege qol jetkizdi. El namysyn toptyq baǵdarlamada Senıorlar komandasy, sondaı-aq Aqmaral Erekesheva men Aıbota Ertaıqyzy qorǵady.
Al №1 ıýnıorlar quramasy 140,5 upaımen komandalyq kópsaıystyń kúmis júldegeri atandy. Quramda ıÝnıorlar komandasynyń sportshylary jáne Anel Dinisheva, Anna Rýbtsova, Lınara Jaılaýova, Aıǵanym Rysbek óner kórsetti.
Jarystyń kelesi kúnderi de astanalyq sportshylar jankúıerlerin qýantty. Lınara Jaılaýova qursaý jattyǵýynda 25.20 upaı jınap, Azııa chempıony atandy.
Aıǵanym Rysbek dop baǵdarlamasynda 24.05 upaımen kúmis medal ıelendi.
Toptyq jattyǵýda №1 Senıorlar quramasy qola medal jeńip aldy. Komanda sapynda Jasmın Júnisbaeva, Krıstına Chepýlskaıa, Aıda Hákimjanova, Aızere Keńes, Aızere Nurmaǵambetova jáne Mádına Myrzabaı óner kórsetti.
№1 ıÝnıorlar quramasy 5 dop fınalynda da kúmis júldege qol jetkizdi. Komanda quramynda Dıana Bıhert, Quralaı Qýanysh, Illarııa Kýrıachenko, Jasmın Qaıyrjanova, Sabına Tótebaeva jáne Ekaterına Prıstennaıa baq synady.
Fınaldyq jarys kúninde de elordalyq sportshylar joǵary nátıje kórsetti. Anel Dinisheva taspa jattyǵýynda 24,60 ball jınap, Azııa chempıony atandy. Anna Rýbtsova urshyq baǵdarlamasynda 25,20 upaımen kúmis medal jeńip aldy.
№1 ıÝnıorlar komandasy 5 lenta fınalynda kúmis júldege ıe boldy. Al №1 senıorlar quramasy 5 dop baǵdarlamasynda 26,30 ball jınap, kúmis medal jeńip aldy. Sonymen qatar 3 qursaý jáne 4 urshyq baǵdarlamasynyń fınalynda da kúmis júldeger atandy.
Aqmaral Erekesheva da fınaldyq kezeńde sátti óner kórsetip, qursaý jáne dop baǵdarlamalarynda eki qola, al urshyq jattyǵýynda kúmis medal enshiledi.
Osylaısha, Azııa chempıonatynyń qorytyndysy boıynsha astanalyq sportshylar 2 altyn, 10 kúmis jáne 3 qola medal jeńip alyp, qurlyq dodasyn erekshe nátıjemen aıaqtady.
Sportshylardy №1 balalar men jasóspirimderdiń mamandandyrylǵan olımpıadalyq rezerv sport mektebiniń jattyqtyrýshylar quramy daıyndady.
Eske sala keteıik, buǵan deıin Qazaqstan quramasy kórkem gımnastıkadan Azııa chempıonatynda 9 medal jeńip alǵanyn jazǵan edik.
