Pavlodar óńirinde sońǵy úsh jylda óndiristegi jazataıym oqıǵalardan 20 adam kóz jumǵan
PAVLODAR. KAZINFORM — Jalpy sońǵy úsh jylda aımaq kásiporyndarynda 313 jazataıym oqıǵa tirkelgen. Saldarynan 336 adam zardap shekken.
Memlekettik eńbek ınspektsııasy komıteti Pavlodar oblysy boıynsha departamentiniń málimetinshe, óńir kásiporyndary men uıymdarynda 2025 jyly 104 jazataıym oqıǵa tirkelip, olardyń saldarynan 113 adam zardap shekken. Onyń ishinde 66 adam aýyr jaraqat alyp, 7 adam ólimi tirkelgen.
— 2024 jyly 103 jazataıym oqıǵa tirkelip, 112 zardap shekken adam anyqtalǵan. 78 adam aýyr zardap alyp, 9 adam kóz jumǵan. Al 2023 jyly tirkelgen 106 jazataıym oqıǵadan 111 adam zardap shekken (onyń 65-i aýyr jaraqat alǵan). Tórt oqıǵa adam ólimimen aıaqtalǵan. Zardap shekkenderdiń basym bóligi taý-ken — metallýrgııa salasynda, bıýdjettik uıymdarda, shaǵyn bıznes sýbektilerinde jáne qurylys salasynda tirkelgen. Óndiristik oqıǵalardyń negizgi sebepteri — jumystyń qanaǵatsyzdandyrarlyq deńgeıde uıymdastyrylýy, zardap shegýshiniń abaısyzdyǵy jáne eńbek qorǵaý men qaýipsizdik talaptarynyń buzylýy, — dep habarlady Kazinform tilshisine departament basshysynyń mindetin atqarýshy Abylaı Sabyrov.
Jazataıym oqıǵalarda eń jıi kezdesetini — adamdardyń bıikten qulaýy, qozǵalmaly, kókte qalyqtap júretin, aınalmaly zattar men bólshekterdiń áseri. Ótken jylǵy statıstıkalyq derekterge úńilsek, kásiporyndar arasynda eń kóp jaraqattanǵan jumyskerler «Qazhrom» TUQ» AQ fılıaly — Aqsý ferroqorytpa zaýytyna tıesili — 10 adam. Sondaı-aq «Eýroazııattyq energetıkalyq korporatsııasy» AQ fılıaly — «Shyǵys» kenishinde — 6 adam, «StekloMır KZ» JShS — 4 adam, «Bogatyr Kómir» JShS — 5 adam, «Prommashkomplekt» JShS — 3 adam, «R.W.S. Concrete» JShS — 2 adam, «PETK» AQ — 2 adam, «Smart Avtobýs PV» JShS — 4 adam jáne «Qazaqstan alıýmınııi» AQ fılıaly elektr stansasynda 2 adam óndiristik jaraqat alǵan.
Al 2025 jyly ólimge ákelgen jazataıym oqıǵalar «Bogatyr Kómir» JShS-de tirkelipti — 2 adam qaza tapqan. Sondaı-aq «Stroı-Dızaın PV» JShS, «QAJservıs» JShS, «Qazhrom» TUQ» AQ fılıaly — Aqsý ferroqorytpa zaýyty, «MK Evrazııa-Agro» JShS men «Gamma Sarykól» JShS-niń árqaısynda kisi ólimimen aıaqtalǵan bir jazataıym oqıǵadan tirkelgen.
Sońǵy jyldary tirkelgen eń qaıǵyly oqıǵalardyń biri — 2024 jyldyń qańtar aıynda Maıqaıyń altyn kenishinde avtobýspen qurdymǵa túsip qaza tapqan 4 qutqarýshynyń ólimi. Qutqarýshylar «Kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby» JShS PF mekemesinde eńbek etken edi.
— Ókinishke qaraı, óndiristik jazataıym oqıǵalardan zardap shekken adamdardyń jumys berýshiden keltirilgen materıaldyq zııandy óteý normasy eńbek zańnamasynda qarastyrylmaǵan. Osy sebepti zardap shekkender azamattyq sotqa óz betterimen júginedi. Al qylmystyq ister boıynsha memlekettik eńbek ınspektsııasynyń materıaldary tergeýler aıaqtalǵannan keıin aýmaqtyq polıtsııa organdaryna joldanady, — dep qosty departament ókili.
Qazirgi ýaqytta elimizde 2024–2030 jyldarǵa arnalǵan «Eńbek qaýipsizdigi» tujyrymdamasyn iske asyrý boıynsha jumystar júrgizilip jatyr. Bul qujat eńbek qaýipsizdigi salasynda jumys berýshilerge qoıylatyn talaptardy ońtaılandyrýǵa baǵyttalǵan sharalar keshenin qamtıdy. Maqsaty — óndiristik jaraqattanýshylyqty tómendetý jáne tıisti memlekettik baqylaýdy qamtamasyz etý.
Departament basshysy aımaqta óndiristik oqıǵalardy aldyn alý jáne kásibı aýrýlardyń profılaktıkasy boıynsha qabyldanatyn sharalar aıasynda 33 kásiporynda «Nóldik jaraqattanýshylyq — Vision Zero» tujyrymdamasy, 22 eńbek uıymynda «Halyqtyq baqylaý» jobasy engizilgenin atap ótti. Bul kásiporyndaǵy eńbek qaýipsizdigin tikeleı baqylaýǵa múmkindik berip otyr. Aımaq kásiporyndarynda 881 óndiristik keńes jumys isteıdi, olardyń mindetine óndiristik jaraqattanýshylyqty boldyrmaý jáne jumys oryndaryndaǵy eńbek jaǵdaılaryn tekserýdi uıymdastyrý kiredi.
Eske sala keteıik, bıylǵy qańtar aıynda «Bogatyr Kómir» jumysshysy óndiristegi jazataıym oqıǵa saldarynan kóz jumdy.
Al onyń aldynda atalǵan kásiporynda jumysshy toqqa túsip qaza tapty.