Pavlodar óńirinde shóptiń bir oramasy qansha turady
PAVLODAR. KAZINFORM - Oblysta mal azyǵyn daıyndaý jumystary tolyq aıaqtalǵan. Qazirgi ýaqytta shóptiń bir býmasy ortasha alǵanda 1 myń teńge, al bir oramasy 10 myń teńge turady.
Aýyl sharýashylyǵy basqarmasynyń málimetinshe, aldaǵy qysta maldy azyqpen qamtamasyz etý úshin 1 mln 316 myń tonna shóp qajet. Jospar 100,5 paıyzǵa oryndaldy.
- Óńirde mal azyǵynyń basqa túrleri boıynsha da qajetti kólem tolyq qamtamasyz etilgen. Atap aıtqanda, 326,5 myń tonna saban, 112,7 myń tonna pishen, 242,1 myń tonna súrlem jáne 220 myń tonna qurama jem daıyndaldy. Qystaqtarǵa 491,8 myń iri qara, 652,6 myń usaq mal jáne 316,2 myń jylqy kiredi, - dep habarlady basqarmadan
Mamandardyń esebinshe, iri qarany qysta kútip-baǵý merzimi 210 kúnge, al usaq maldiki 200 kúnge sozylady.
Qazirgi ýaqytta oblys boıynsha qurama jemniń ortasha baǵasy tonnasyna 80 myń teńge bolsa, kebektiń bir tonnasy 70 myń teńgeden satylyp jatyr.
Ótken jyldardan qalǵan mal azyǵy qory da bar. Atap aıtqanda, 225,1 myń tonna shóp, 11 myń tonna pishen, 32 myń tonna súrlem jáne 28,1 myń tonna qurama jem saqtalǵan.
Eske sala keteıik, Qazaqstanda 41 mln tonnadan astam jemshóp daıyndaldy.
