Pavlodar óńirinde shóp baǵasy ózgerdi

PAVLODAR. KAZINFORM – Qazir oblysta shóptiń tonnasy 20-25 myń teńge turady. Fermerler mal azyǵyn jetkilikti kólemde jınap alǵan.

Ertis-Baıan óńirinde mal azyǵynyń qymbattaýy baıqalyp otyr. Shóptiń tonnasy keıbir jerlerde 25 myń teńgege saýdalanyp jatyr.

- Qoldaǵy jedel aqparattarǵa súıensek, shóp baǵasynyń ósýi tirkeldi. Bir tonna shóptiń baǵasy 20 myń teńgeden 25 myń teńgege deıin jetedi. Bul baǵa ótken jylǵymen salystyrǵanda 5-10 % qymbat. Shóp baǵasynyń artýy negizinen dalaly jerlerde kezdesedi. Sebebi atalǵan aýmaqtardaǵy shabyndyqtyń ónimdiligi jaıylmalarǵa qaraǵanda az bolyp keledi, - deıdi óńirlik Aýyl sharýashylyǵy basqarmasynyń bólim basshysy Qaıyrbolat Baısarınov.

Sońǵy derekterge súıensek, oblysta ótken jyldardan qalǵan mal azyǵyn eseptegende 1 mln 215 myń tonnadan astam shóp qory bar. Bul qolda bar tórt túlikti qystan aman alyp shyǵýǵa tolyq jetkilikti. Oblysta shamamen 499,7 myń bas iri qara, 700 myńǵa jýyq qoı-eshki, 305,4 myń jylqy bar. Qystaqtarǵa 450,6 myń bas iri qara, 615 myń qoı-eshki, 273,1 myń bas jylqy kiredi degen jospar tur.

Eske sala keteıik, bıyl jazda Pavlodarda bir tonna shóptiń shyǵyny 50 myń teńgege deıin jetken.