Pavlodar óńirinde medıtsınalyq dıagnostıkalaýda JI qoldanyla bastady
PAVLODAR. KAZINFORM - Pavlodar oblysynda jasandy ıntellekt qoldanylatyn biryńǵaı teleradıologııa júıesi engizildi. Júıe dárigerlerge medıtsınalyq keskinderdi qashyqtan taldaýǵa, zertteý nátıjelerimen almasýǵa jáne yqtımal ózgeristerdi anyqtaý úshin JI tehnologııalaryn paıdalanýǵa múmkindik beredi.
Oblystyq onkologııalyq dıspanserdiń teleradıologııa ahýaldyq ortalyǵynda (PACS) zamanaýı tsıfrlyq júıe qoldanyla bastady. Emdeý mekemesi zamanaýı medıtsınalyq jabdyqtarmen 98% qamtamasyz etilgen.
Olardyń qatarynda 64 keskindi kompıýterlik tomograf, qýaty 1,5 Tesla magnıttik-rezonanstyq tomograf, beıneendoskopııalyq keshender, S-tárizdi doǵaly rentgen apparaty, radıojıilikti ablıatsııa apparaty jáne shaǵyn ınvazıvti otalarǵa arnalǵan jabdyqtar bar. Sondaı-aq dıspanserde amerıkalyq VARIAN kompanııasynyń VitalBeam jelilik údetkishi ornatylǵan.
Qazirgi ýaqytta óńirde JI qoldanylatyn biryńǵaı PACS/RIS teleradıologııa júıesin engizý jumystary tolyq aıaqtalǵan. Júıe 22 medıtsınalyq uıymdy qamtıdy jáne «Damýmed» pen «Nadejda» aqparattyq platformalarymen biriktirilgen. Júıege rentgen apparattary, flıýorograftar, mammograftar, kompıýterlik jáne magnıttik-rezonanstyq tomograftar, angıograftardy qosa alǵanda, 96 dıagnostıkalyq jabdyq qosylǵan. Búginde tsıfrlyq muraǵatta 60 myńnan astam zertteý nátıjesi jınaqtalǵan.
- Zamanaýı tsıfrlyq tehnologııalar medıtsına qyzmetkerleriniń jumysyna naqty nátıje berip jatqany mańyzdy. Olar dárigerlerdiń múmkindikterin keńeıtip, tekseristi jedel júrgizýge jáne qashyqtyqqa qaramastan áriptesterinen keńes alýǵa múmkindik beredi. Eń bastysy - bul búkil oblys turǵyndaryna, sonyń ishinde shalǵaı aýdandarda turatyn azamattarǵa medıtsınalyq kómektiń qoljetimdiligi men sapasyn arttyrady. Biz aýrýlardy der kezinde anyqtaýǵa jáne óńir turǵyndarynyń densaýlyǵyn saqtaýǵa yqpal etetin osyndaı jobalardy aldaǵy ýaqytta da qoldaıtyn bolamyz, - dep atap ótti oblys ákimdiginen.
Júıeniń tolyqqandy jumys isteýi úshin rentgenolog dárigerlerge arnalǵan 53 jumys stantsııasy, 49 medıtsınalyq dıagnostıkalyq monıtor jáne rentgen-zerthanashylarǵa arnalǵan 62 kompıýter iske qosylǵan. Sonymen qatar balamaly jabdyqtarǵa arnalǵan 14 tsıfrlandyrý qurylǵysy men mammograftarǵa arnalǵan eki tsıfrlyq detektor ornatylǵan. Jańa júıemen jumys isteý boıynsha 148 medıtsına mamany oqytýdan ótken.
Eske sala keteıik, Qytaı jasandy ıntellektini qaýipti aýa raıyn boljaýǵa úıretti.
