Pavlodar óńirinde qysta qandaı ańdardy aýlaýǵa bolady
PAVLODAR. KAZINFORM — Orman sharýashylyǵy jáne janýarlar dúnıesi aýmaqtyq ınspektsııasy bıylǵy 1 qarashadan 2026 jyldyń 15 aqpanyna deıin túlki, qarsaq jáne qoıandardy aýlaý maýsymy ashyq bolatynyn habarlady.
Ertis-Baıan óńirinde terisi baǵaly jabaıy janýarlar — túlki, qarsaq jáne qoıandy aýlaýǵa ańshylyq maýsym ashyldy. Sondaı-aq 31 jeltoqsanǵa deıin tuıaqty janýarlardy — qabandar men sibir elikterin aýlaý jalǵasady. Tuıaqty jabaıy janýarlardy aýlaý kezinde tıisti ańshylyq sharýashylyǵynyń qoryqshysy birge júredi.
— Ań aýlaý kezinde árbir áýesqoı ańshynyń ózimen birge ruqsat berý qujattary bolýy tıis. Atap aıtqanda, ańshy kýáligi, janýarlar dúnıesin paıdalanýǵa ruqsat, ańshylyq sharýashylyǵy sýbektisiniń joldamasy, ańshylyq atys qarýyn saqtaýǵa jáne alyp júrýge berilgen ruqsat, ań aýlaıtyn jyrtqysh qustardyń pasporty qajet, — dep málimdedi Pavlodar oblystyq orman sharýashylyǵy jáne janýarlar dúnıesi aýmaqtyq ınspektsııasynyń basshysy Isataı Ábdirazahov.
2025-2026 jyldardaǵy kúzgi-qysqy maýsymda Pavlodar oblysyndaǵy jabaıy janýarlar men qustardy aýlaýǵa arnaıy kvota belgilengen. Atap aıtqanda, oblys aýmaǵynan 22 bas qaban, 365 elik, 807 qarsaq, 2935 túlki, 489 borsyq, 167 aqkis (sýsar tuqymdas), 848 dala sýsary, 10 507 qoıan, 20 983 sýyr, 5 936 qaz, 45 764 úırek, 5 870 qasqaldaq, 2 450 shalshyqshy, 654 qur, 2939 shil, 588 bódene aýlaýǵa bolady.
Oblys aýmaǵynda 36 ańshylyq sharýashylyǵy bar bolsa, sonyń 33-inde ańshylyqqa ruqsat etilgen. Ańshylyq sharýashylyǵyn júrgizý sýbektilerdiń óz qarajaty esebinen qamtamasyz etiledi, ony damytýǵa sýbsıdııa bólinbeıdi. Keler jyldan bastap Sharbaqty jáne Aqqýly aýdandarynda da ań aýlaýǵa ruqsat etiledi dep kútilip otyr.
Aýmaqta Baıanaýyl memlekettik ulttyq tabıǵı parkiniń «Qyzyltaý» memlekettik qaýmalynda, «Ertis ormany» rezervaty men «Ertis ózeniniń jaıylmasy» qaýmalynda, oblystyń arnaıy qoryndaǵy ańshylyq alqaptarda ań aýlaýǵa tyıym salynǵan.
Atap óterligi, atýǵa tyıym salynǵan jabaıy ańdarǵa myltyq kezeseńiz, ákimshilik jáne qylmystyq jaýapkershilikke tartylasyz. Arqardy atqandarǵa — 1500 AEK, bulanǵa — 500 AEK, qaban men elikke (kvotadan asqany) — 250 AEK, maral úshin 200 AEK aıyppul jazylady.
Buǵan deıin Ertis-Baıan óńirinde qaban kóbeıe bastaǵany týraly jazǵanbyz.