Pavlodar óńirinde qar basý qaýpi bar 222 jol ýchaskesi anyqtaldy
PAVLODAR. KAZINFORM – Pavlodar oblysynda qys mezgilinde qar basý qaýpi bar jalpy uzyndyǵy 414,48 shaqyrym 222 jol ýchaskesi anyqtaldy. Onyń basym bóligi aýdandyq jáne respýblıkalyq mańyzy bar avtokólik joldaryna tıesili.
Ótken jyldardaǵy qysqy kezeńderdiń tájirıbesi eskerilip, qar basý qaýpi bar ýchaskelerdiń tizimi jasalǵan. Atap aıtqanda, respýblıkalyq mańyzy bar joldarda 170,48 shaqyrymdy qamtıtyn 128 ýchaske, oblystyq joldarda 38 shaqyrymdyq 11 ýchaske, aýdandyq mańyzy bar joldarda 206 shaqyrymdyq 83 ýchaske bar.
- Qys mezgilinde joldardyń qaýipsiz ári úzdiksiz jumysyn qamtamasyz etý úshin merdiger uıymdarmen 43 shart jasalǵan. Onyń úsheýi oblystyq, ózgesi aýdandyq mańyzy bar avtokólik joldaryn kútip ustaýǵa qatysty. Jergilikti mańyzy bar joldardy qysqy kútip ustaýǵa 334 arnaıy tehnıka jumyldyrylady. Onyń 101-i oblystyq, 233-i aýdandyq mańyzy bar joldarǵa qyzmet kórsetedi, - dep habarlady óńirlik tótenshe jaǵdaılar departamentinen.
Qar qursaýynan qorǵaý úshin oblystyq mańyzy bar joldarda jalpy uzyndyǵy 9 710 metr qar toqtatqysh qalqan ornatylǵan.
Budan bólek, «QazAvtoJol» UK» AQ joldardy qar basýdan qorǵaý jónindegi jol kartasyn ázirlegen. Qujatqa sáıkes, 2 210 shaqyrym aýmaqta qar toqtatatyn orlar men úıindiler jasaý, sondaı-aq 2 620 metr aǵash qalqan ornatý josparlanǵan.
Qysqy kezeńde joldarda tótenshe jaǵdaı týyndasa, turǵyndardy qabyldaý úshin oblysta 189 jylytý pýnkti ázirlengen. Olardyń jalpy syıymdylyǵy 15 943 adamǵa arnalǵan.
Eske sala keteıik, bıyl qysta Pavlodar óńiriniń respýblıkalyq avtojoldarynda 10 jylytý pýnkti jumys isteıdi.
