Pavlodar óńirinde qandaı ań-qustarǵa myltyq kezenýge bolmaıdy
PAVLODAR. KAZINFORM — Ertis-Baıan óńirindegi ańshylyq alqaptardyń jalpy aýmaǵy 9 mln gektardan asady. Aýmaqta 36 ańshylyq sharýashylyǵy bar.
Ańshylyq sharýashylyqtardyń aýmaǵynda janýarlar dúnıesin qorǵaý jáne ósimin molaıtýǵa baǵyttalǵan jumystar turaqty júrgiziledi. Jyl saıyn ańshylyq sharýashylyǵy sýbektileri jabaıy ań-qustardy esepke alyp, negizgi ańshylyq túrleri popýlıatsııalarynyń jaı-kúıin anyqtaıdy. Bul málimetter janýarlardy aýlaýǵa ruqsat etilgen kólemin belgileý kezinde eskeriledi.
Qandaı ań-qustardy aýlaýǵa tyıym salynǵan?
— Aýmaqta ańshylyqqa ruqsat etilgen túrlermen qatar sırek kezdesetin jáne joǵalyp ketý qaýpi bar janýarlardyń 16 túri mekendeıdi. Olarǵa ańshylyq jasaýǵa tyıym salynǵan, — dep habarlady oblystyq orman sharýashylyǵy jáne janýarlar dúnıesi aýmaqtyq ınspektsııasynan.
Qazaqstannyń Qyzyl kitabyna engizilgen sırek jáne joıylyp ketý qaýpi bar janýarlar kelesideı:
— arqar;
— orman sýsary;
— qara degelek;
— aqbas tyrna;
— taztyrna;
— bezgeldek;
— qarabas ógizshaǵala;
— suńqyldaq aqqý;
— balyqshy tuıǵyn;
— dala qyrany;
— qaraqus;
— búrkit;
— aqıyq sýbúrkit;
— aqquıryqty sýbúrkit;
— ıtelgi;
— úki.
Sońǵy jyldary sany kúrt ósip kele jatqan tuıaqty janýarlardyń biri — kıik. Kıik sany kóbeıýine qaramastan, bul janýarǵa ańshylyq jasaýǵa tyıym salynǵan.
Qandaı ań-qusqa ańshylyq jasaýǵa ruqsat etilgen?
Oblystyq orman sharýashylyǵy jáne janýarlar dúnıesi aýmaqtyq ınspektsııasynyń málimetinshe, ańshylyq sharýashylyqtarda birqatar jabaıy janýarlardy aýlaýǵa bolady.
Atap aıtqanda,
— sibir eligi;
— qaban;
— baıbaq sýyry;
— aq qoıan;
— sur qoıan;
— túlki;
— qarsaq;
— borsyq;
— úırekter men qazdardyń barlyq túrleri;
— sur kekilik;
— qasqaldaq;
— bódene;
— qumsalǵysh;
— kógershin;
— qaraquıryq
Inspektorlar bul ań-qustardy aýlaýǵa ruqsat alý ańshylyqty kez kelgen ýaqytta jáne shekteýsiz júrgizýge bolady degendi bildirmeıtinin aıtady. Ań aýlaýdyń sıpaty men qarqyndylyǵy maýsymǵa, naqty túrdiń popýlıatsııalyq jaǵdaıyna, belgilengen ańshylyq merzimderine, lımıtter men kvotalarǵa baılanysty. Munda áýesqoılyq jáne sporttyq ań aýlaý keń taralǵan. Ásirese sýda júzetin jáne dalalyq qustardy aýlaýǵa qyzyǵýshylyq tanytatyndar kóp.
Aımaqta ańshylyqqa qatysty birqatar uıymdastyrý jumystaryn «Qansonar» ańshylar men ańshylyq sharýashylyǵy sýbektileriniń respýblıkalyq qoǵamdyq birlestikteri qaýymdastyǵy júzege asyrady. Qaýymdastyq ańshylyq mınımýmǵa oqytý, ańshylardy tirkeý, ań aýlaýǵa ruqsat berý jáne basqa da máselelermen aınalysady.
Eske sala keteıik, Pavlodarda jyrtqysh janýardyń shabýylyna ushyraǵan jaraly aqqý qutqaryldy.
Al jýyqta Ertis ormanynda kólik sońynan tura júgirgen bulan jurtty tańǵaldyrdy.
Sondaı-aq 29 tamyzdan bastap Ertis boıynda kúzgi-qysqy ańshylyq maýsymy ashylǵanyn jazǵanbyz.
