Pavlodar óńirinde gonkong tumaýyna 42 adam shaldyqqan

PAVLODAR. KAZINFORM - Gonkong tumaýyn juqtyrǵandardyń teń jartysy 14 jasqa deıingi balalar. Al aýyrǵandardyń deni oblys ortalyǵynda turady.

Óńirlik sanıtarııalyq-epıdemıologtıalyq baqylaý departamentiniń málimetinshe, epıdemıologııalyq maýsym bastalǵaly JRVI-men aýyrýdyń 72 861 jaǵdaıy tirkelgen. Naýqastardyń deni, ıaǵnı 46 981-i – 14 jasqa deıingi balalar.

- Sońǵy bir aptada JRVI-ǵa shaldyǵýdyń jańadan 17 070 jaǵdaıy anyqtalyp otyr. Kórsetkishter ótken aptamen salystyrǵanda sál ósken. Negizinen oblystyń jekelegen aýdandarynda baıqaldy. Bul epıdjaǵdaıdyń kún saıynǵy baqylaý deńgeıinen aspaǵanyn jáne aýrýǵa shaldyǵýdyń maýsymdyq dınamıkasyna sáıkes keletinin bildiredi. Eki qalada jáne tórt aýdanda aýrýǵa shaldyǵýshylyq 5,8 %-dan 29 %-ǵa deıin tómendegen, - deıdi Pavlodar oblysynyń sanıtarııalyq-epıdemıologııalyq baqylaý departamenti basshysynyń orynbasary Zámzágúl Doşanova.

Bıylǵy maýsymda oblys aýmaǵynda gonkong tumaýyn juqtyrýdyń 42 deregi anyqtalǵan.

Mamandar onyń teń jartysy 14 jasqa deıingi balalar ekenin aıtady. Pavlodar qalasynda – 19, Ekibastuzda – 10, Aqsý qalasynda 2 jaǵdaı tirkelgen. Sondaı-aq Aqqýly, Pavlodar, Sharbaqty aýdandarynda tumaýdyń jańa túri belgili boldy.

«Ulttyq saraptama ortalyǵy» RMK fılıalynyń vırýsologııalyq zerthanasynda tumaýǵa tán emes 510 synama zerttelip, 7 jaǵdaıda rınovırýs, bokavırýs, koronavırýs juqtyrý jaǵdaılary anyqtalǵan.

- Epıdemıologııalyq jaǵdaı baqylaýda, barlyq qajetti profılaktıkalyq jáne epıdemııaǵa qarsy sharalar júrgizilýde. Turǵyndarǵa jeke aldyn-alý sharalaryn saqtaý usynylady. Atap aıtqanda qolyńyzdy sabynmen jıi jýyp, antıseptık qoldanyńyz, páter men jumys bólmelerin jeldetińiz, adamdar kóp jınalatyn jerlerden aýlaq bolyńyzdar, - dep keńes berdi Zámzágúl Doşanova.

Eske sala keteıik, Batys Qazaqstanda 75 adam gonkong tumaýyna shaldyqqan.