Pavlodar óńirinde ekologııalyq zańnama talaptaryn buzýdyń 77 deregi anyqtaldy

PAVLODAR. KAZINFORM - Oblystyq ekologııa departamenti jyl basynan kásipkerlik sýbektilerine qatysty 78 tekserý júrgizip, birqatar zań buzýshylyqtardyń betin ashqan.

Tekserý nátıjeleri boıynsha ekologııalyq zańnama talaptaryn buzýdyń 77 deregi tirkeldi. Zań buzýshylyqtardy joıý týraly 62 nusqama berilip, jalpy somasy 875 mln 891 myń 529 teńge mólsherinde 47 ákimshilik aıyppul salý týraly qaýly shyǵarylǵan.

- Tekserý is-sharalarynyń nátıjeleri boıynsha qaldyqtarmen jumys isteý salasyndaǵy zań buzýshylyqtardy, ekologııalyq ruqsatsyz lastaýshy zattar shyǵaryndylaryn júzege asyrý faktilerin, belgilengen shyǵaryndylar lımıtteriniń artýyn, sondaı-aq memlekettik ekologııalyq saraptama qorytyndysynyń talaptarynyń saqtalmaýyn anyqtadyq, - deıdi ekologııa departamentiniń basshysy Qanat Musaparbekov.

QR Kásipkerlik kodeksiniń 144-baby 5-tarmaǵynda baqylaý sýbektilerine jospardan tys tekserýler taǵaıyndaýdyń negizderi kózdelgen. Bıyl atalǵan bapqa súıene otyryp departamentpen baqylaý sýbektilerine qatysty 52 jospardan tys tekserý júrgizilgen.

Mysaly, lastaýshy zattardyń normatıvten tys shyǵarylǵany úshin «Aqsý ferroqorytpa zaýyty – «TNK «Qazhrom» AQ fılıaly» 854,9 mln teńge ákimshilik jaýapkershilikke tartyldy.

Artyq gazdardy ruqsatsyz jaǵý arqyly shekten tys emıssııalardy júzege asyrǵany úshin «Pavlodar munaı-hımııa zaýyty» JShS-na 2,4 mln teńge, «ER LIKID MUNAI TEH GAZY» JShS-na 4,5 mln teńge aıyppul salynǵan. 

Al «StroıEtalon» JShS qaldyqtarmen jumys isteý kezinde ekologııa zańnamasyn buzǵany úshin 2,7 mln teńge aıyppul arqalaǵan.

Eske sala keteıik, medıtsınalyq qaldyqtardy durys saqtamaǵan pavlodarlyq kompanııa qomaqty aıyppul arqalady.