Pavlodar óńirinde eki jylda tuńǵysh ret úshem dúnıege keldi
PAVLODAR. KAZINFORM — Sońǵy eki jylda oblysta úshemniń týýy birinshi ret tirkelgen. Anasy sábılerine Aıat, Isa jáne Alan esimderin bergen.
Dárigerlerdiń málimetinshe, eki náresteniń salmaǵy eki kılogramnan assa, úshinshisiniń salmaǵy bir jarym kılogramǵa jýyq. Kenjesi ázirshe dárigerlerdiń baqylaýynda.
— Bala qarqyndy baqylaýda. Deıturǵanmen ottegi apparatyna táýelsiz, ózi tynys alyp jatyr. Bizge onyń belgili bir salmaq jınap, anasynyń omyraýyn jaqsy soryp úırengeni qajet. Sodan keıin anasyna beremiz. Anasy kelip, jaǵdaıyn bilip turady, — deıdi Pavlodar oblystyq № 1 perınataldyq ortalyǵynyń dırektory Gúlnar Býrataeva.
Úshemdi bosanǵan ana Madına Qazenovanyń jasy 33-te. Ol úshin bul — ekinshi júktilik, úlken qyzy 12 jasta. Úshem EKO protsedýrasynyń nátıjesinde ómirge kelgen.
— Úshem bosanatynymdy bilgende alǵash dárigerlerdiń sózine senbep edim. Bul shynynda bizdiń otbasymyz úshin tańǵajaıyp oqıǵa bolyp otyr, — dep qýanyshymen bólisti kópbalaly ana.
Pavlodar oblysy ákiminiń orynbasary Aıgúl Malıkova otbasyn quttyqtady. Ol anasy men nárestelerge berik densaýlyq tilep, úsh oryndy balalar arbasyn satyp alýǵa sertıfıkat tabystady.
Óńirlik densaýlyq saqtaý basqarmasynyń habarlaýynsha, jyl basynan beri Pavlodar oblysynda 4250 sábı dúnıege kelgen. Onyń ishinde 33 egiz jáne bir úshem bar.
Buǵan deıin elimizde egizder men úshemder kóbine qaı óńirde dúnıege keletinin jazǵanbyz.
