Pavlodar óńirinde belgisiz indetten 1,5 myńǵa jýyq úı qusy qyrylyp qaldy
PAVLODAR. KAZINFORM - Oblystyń tórt aýdanynda qustardyń qyrylǵany anyqtaldy. Veterınarlar ázirshe onyń sebebin tappaı otyr.
Tereńkól, Jelezın, Sharbaqty jáne Aqtoǵaı aýdandarynda úı qustary ólip jatyr.
Turǵyndardyń aıtýynsha, qaýyrsyn qanattylardyń qyrylýy qyrkúıek aıynyń basynda tirkelgen. Qaz, úırek, taýyqtar bastaryn qanatynyń astyna tyǵyp alǵan kúıi sulap túsedi.
Veterınarııa basqarmasy qustardyń qyrylýyn rastady. Biraq ázirshe indettiń naqty sebebi belgisiz. Sondyqtan mamandar dezınfektsııalyq sharalardy áli bastaı almaı otyr.
- Ótken jumada veterınarııa boıynsha referendtik ortalyqtan mamandar kelip, jabaıy qustardyń da synamalaryn zertteýge aldy. Biraq áli kúnge deıin nátıjesi kelgen joq. Oblys boıynsha ólgen qustyń sany 1,5 myńǵa deıin jetedi, - deıdi óńirlik veterınarııa basqarmasy basshysynyń orynbasary Ǵalym Beısenov.
Buǵan deıin SQO-da úı qustary belgisiz aýrýdan qyrylyp jatqany týraly jazǵanbyz.
