Pavlodar óńirinde aqqýlar jappaı jyly jaqqa usha bastady

Pavlodar orman jáne janýarlar dúnıesin qorǵaý mekemesiniń basshysy Ajdar Júsipov Aqqý kólinen túsirilgen fotosýretterdi Kazinform aqparattyq agenttigimen bólisti.

- Munda Qazaqstannyń Qyzyl kitabyna engizilgen suńqyldaq aqqýlar júzip júr. Olar ońtústikke ushýǵa daıyndalyp jatqan sııaqty. Keremet kórinis, kólde aqqýlar óte kóp. Tabıǵatty aıalaıyq, – deıdi mekeme basshysy.

Onyń aıtýynsha, aqqýlardyń kúzgi qonys aýdarýy ádette qyrkúıek aıynda bastalyp, qazan-qarashada jalǵasady. Qustar sý aıdyndarynyń jaǵdaıyna, aýa raıyna jáne qorek qorynyń jetkiliktiligine qaraı jyly jaqqa bet alady.

Kúzgi kósh kezinde aqqýlar Qazaqstannyń ońtústik jáne ońtústik-batys óńirlerine, sondaı-aq Ortalyq Azııanyń jyly aımaqtaryna qaraı ushýy múmkin. Jol boıynda ózen-kólderge aıaldap, tynyǵady jáne qorektenedi.

Mamandar Pavlodar oblysynda jabaıy qustardy baqylaý kezinde olardyń sany, ornalasqan jeri men jaǵdaıy nazarǵa alynatynyn aıtady. Eger jaraqattanǵan nemese álsiregen qustar anyqtalsa, olarǵa kómek kórsetiledi.

Eske sala keteıik, byltyr Pavlodarda aýyl turǵyny aıazda qalyp qoıǵan qos aqqýdy qutqaryp qalǵan edi.

Al bıyl kóktemde muz qursaýynan qutqarylǵan álgi aqqýlar aıdynyna qaıta oraldy.