Pavlodar óńirinde AITV-nyń anadan balaǵa juǵý jaǵdaılary tirkelgen

PAVLODAR. KAZINFORM — Bıyl alǵashqy on aıda oblys boıynsha adamnyń ımmýn tapshylyǵy vırýsyn (AITV) juqtyrýdyń 191 jańa jaǵdaıy anyqtalǵan. Olardyń 118-i er adam.

Mamandar adamnyń ımmýn tapshylyǵy vırýsyn (AITV) juqtyrǵandar sany ósip kele jatqanyn aıtady. Jalpy oblysta qaýipti vırýspen ómir súretin 2830 adam tirkelgen. Bıyl 10 aıda jańadan 191 jaǵdaı anyqtalsa, olardyń 118-i — er adamdar. Jyl saıyn oblysta ortasha eseppen 200-250 jaǵdaı esepke alynady.

— Bizdiń basty mindetimiz indetke qarsy kemsitýshilikti joıý. Dál osy túsinbeýshilik ınfektsııamen kúreske kedergi keltiredi. Sol sebepti biz adamdarǵa AITV qalaı juǵatynyn, qalaı saqtanýǵa bolatynyn kóbirek túsindiremiz. Óıtkeni AITV — sozylmaly aýrý. Emdeý uzaq ýaqytqa sozylady, — deıdi Pavlodar oblystyq AITV ınfektsııasynyń aldyn alý jónindegi ortalyq basshysynyń orynbasary Baqyt Janahmetova.

Bıyl tirkelgen jaǵdaılar boıynsha eń jıi taralý joly — jynystyq qatynas, 67,5 paıyzdy quraıdy. Ekinshi orynda — esirtkini kóktamyr arqyly qoldaný — 24,6%. Sondaı-aq, anadan balaǵa juǵý jaǵdaılary da bar (1%). 

Ortalyq málimetinshe, esepte turǵan naýqastardyń 99,2 paıyzy, ıaǵnı 2411 adam antıretrovırýstyq terapııa qabyldap keledi. Olardyń ishinde 18 jasqa deıingi 20 bala bar.

Mamandardyń aıtýynsha, dál osy terapııa ınfektsııany baqylaýda ustap, adamnyń tolyqqandy ómir súrý múmkindigin arttyrady.

Buǵan deıin AITV dıagnozymen ómir súrýdi qalaı úırenýge bolatyn jazǵanbyz.