Pavlodar óńirinde 29 tamyzdan bastap kúzgi-qysqy ańshylyq maýsymy ashylady

Pavlodar oblystyq orman sharýashylyǵy jáne janýarlar dúnıesi aýmaqtyq ınspektsııasynyń málimetinshe, óńirde barlyǵy 36 ańshylyq sharýashylyq bar. Kúzgi-qysqy ańshylyq maýsymyna olardyń 33-ine ruqsat berilgen.

Buǵan qosa bes jyldyq úzilisten keıin Sharrbaqty men Aqqýly aýdandaryndaǵy ańshylyq sharýashylyqtary qaıta jumys isteı bastaıdy. Buǵan kásipshilik shekaralaryn belgileý jumystary sebep bolǵan.

- 29 tamyzdan bastap Pavlodar oblysynda qaz, úırek jáne kekilikti aýlaýǵa ruqsat beriledi. 1 qyrkúıekten bastap borsyq, al 5 qyrkúıekten bastap qur, shil jáne qaban aýlaýǵa bolady. Sibir eliginiń atalyqtaryn aýlaý 15 qyrkúıekte ashylady. Sondaı-aq 1 qarashadan bastap qoıan, túlki jáne qarsaq aýlaýǵa ruqsat etiledi, – deıdi óńirlik orman sharýashylyǵy jáne janýarlar dúnıesi aýmaqtyq ınspektsııasynyń bólim basshysy Arman Muqataev.

Qaz, úırek, shil jáne kekilik aýlaýǵa 30 qarashadan keıin tyıym salynady. Borsyqqa – 15 qarashadan, qurǵa – 15 jeltoqsannan, sibir eligine 31 jeltoqsannan keıin ańshylyq jasaýǵa bolmaıdy. Qoıan, túlki jáne qarsaq aýlaý maýsymy 15 aqpanda aıaqtalady.

Aıta keteıik, jazǵy kezeńde óńirde ańshylyqtyń eki túrine ǵana – sýyr men sibir eliginiń atalyqtaryn aýlaýǵa ruqsat berilgen. Al qasqyr atýǵa tyıym salynǵan.

- Oblys aýmaǵynda qasqyr sany kóp emes, shamamen 200-deı ǵana. Sondyqtan olardyń sanyn retteý jumystary júrgiziledi. Qasqyrlardy tek úı janýarlaryna nemese adamdarǵa shabýyl jasaý faktileri bolǵan jaǵdaıda ǵana atýǵa ruqsat etiledi, – deıdi Arman Muqataev.

Búginde Pavlodar oblysynda shamamen 6-7 myń ańshy bar. «Qyzyltaý» memlekettik tabıǵı qaýmalynda, Baıanaýyl ulttyq parkinde, «Ertis ormany» rezervaty aýmaǵynda, Ertis ózeniniń jaıylmasynda jáne ańshylyq alqaptardyń rezervtik qory aýmaǵynda ań aýlaýǵa tyıym salynǵan.

Eske sala keteıik, budan bylaı Ertis ormany aýmaǵyna kirý aqyly bolady.