Pavlodar óńirinde 2,5 myńǵa jýyq jup bedeýlik dıagnozymen esepte tur

PAVLODAR. KAZINFORM — Bıyl «Ańsaǵan sábı» baǵdarlamasy boıynsha elimizde 7 myń kvota bólingen. Onyń tek 250-i ǵana Ertis-Baıan óńirine qarastyrylǵan. 

«Ańsaǵan sábı» baǵdarlamasy aıasynda sońǵy jyldary Pavlodar oblysyna myńnan astam kvota bólingen. Deıturǵanmen bedeýlik máselesi óte ózekti. Statıstıka sany boıynsha Qazaqstanda árbir altynshy otbasy sábı súıe almaı júr. 

Al aımaqta 2400-den asa jup bedeýlik dıagnozymen esepke alynǵan. Sondyqtan tegin EQU-ǵa ekiniń biriniń qoly jete bermeıdi.

— Bedeýlik máselesimen betpe-bet kelgen otbasylar úshin 2021 jyldan bastap elimizde «Ańsaǵan sábı» memlekettik baǵdarlamasy iske qosyldy. Joba aıasynda jyl saıyn respýblıka boıynsha 7 myń kvota bólinip keledi. Biraq bizdiń oblysqa beriletin kvota mólsheri 200-diń ústinde ǵana. Byltyr 280 kvota berilse, bıyl 250 kvota ǵana bólinip otyr, — deıdi reprodýktıvtik densaýlyq jáne prenataldy dıagnostıka ortalyǵynyń akýsher-gınekolog dárigeri Alma Qatpına.

Mamannyń sózinshe, bedeýliktiń birneshe sebebi bar. Áıelder tarapynan jynystyq jolmen beriletin ınfektsııalar, buryn jasalǵan operatsııalar nemese jatyr tútikteriniń bitelýi sebep.

Sondaı-aq endokrındik faktorlar da mańyzdy ról atqarady. Artyq salmaq, durys tamaqtanbaý, kúızelis pen qımyl-qozǵalystyń azdyǵy da sebepker.

Eske sala keteıik, Qytaı ǵalymdary bedeýlikti emdeýdiń jańa tásilin tapty.