Pavlodar óńirinde 200-den astam adam aǵzasyn aýystyrýǵa muqtaj

PAVLODAR. KAZINFORM — Aımaqta 510 adam ólimnen keıingi donorlyqqa kelisim bergen. Alaıda byltyr 15 áleýetti donordyń bireýi ǵana donor bolǵan.

Pavlodar oblysy boıynsha transplantatsııa jónindegi úılestirýshi Dmıtrıı Poterebýhtyń aıtýynsha, búginde elimiz boıynsha aǵza almastyrý kezeginde (kútý paraǵynda) 4,5 myńǵa jýyq adam tur. Olardyń 3,9 myńnan astamy — búırek almastyrýdy qajet etetin retsıpıentter. Eger 2024 jyly respýblıkada qaıtys bolǵannan keıingi donorlyqtyń nebári 6 jaǵdaıy tirkelse, 2025 jyly bul kórsetkish 3 ese artqan. Deıturǵanmen transplantolog maman bul kórsetkish áli de bolsyn az ekenin aıtady.

— Tek bizdiń óńirimiz boıynsha transplantatsııaǵa muqtaj 213 patsıent bar. 193 adamnyń búıregin, 10 adamnyń baýyryn, 3 adamnyń júregin aýystyrý qajet. Taǵy bir adam jańa ókpege zárý. Aımaqta jalpy sany 510 adam ólimnen keıingi donorlyqqa kelisim bergen. Alaıda byltyr 15 áleýetti donordyń bireýi ǵana donor bola aldy. Qalǵan jaǵdaıda marqumdardyń týystary kelisim bermedi, — deıdi ol.

Onyń sózinshe, Qazaqstanda transplantologııa jaqsy damyp keledi. Joǵary bilikti mamandar bar, qajetti jabdyqtarmen qamtylǵan, asqyný qaýpi mınımaldy. eGov portalynda qaıtys bolǵannan keıingi donorlyqqa qatysty erik bildirý bólimi bar. Ony 145 myńnan astam adam paıdalanyp, 12,6 myń adam kelisim bergen.

Eske sala keteıik, Almaty oblysynda donor birneshe adamnyń ómirin qutqaryp qaldy.