Pavlodar óńirinde 100 myńnyń ústinde kıik bar
PAVLODAR. KAZINFORM — Betpaqdala popýlıatsııasyna jatatyn jabaıy janýarlar Baıanaýyl men Maı aýdandarynyń aýmaǵyn mekendeıdi. Olardy egistik jerlerden dalaly aýmaqtarǵa qaraı aıdaý jumystary uıymdastyrylýda.
Mamandardyń aıtýynsha, kıik sanynyń kóbeıýine janýarlardy qorǵaý sharalarynyń qolǵa alynýy jáne klımattyq jaǵdaıdyń qolaıly bolýy áser etken. Sondaı-aq bıyl aqbókender kóbine egizden tóldegen. Janýarlar jappaı qonys aýdarǵan kezde aýyl sharýashylyǵy alqaptaryna zııan keltirýi múmkin. Osyǵan baılanysty Maı aýdanynda janýarlardy egistik jerlerden jaıylymǵa qaraı aıdaý jumystary uıymdastyrylǵan.
Kóktóbe ormanshylyǵynyń sheberi Erik Túsipovtiń aıtýynsha, sońǵy jyldary egistik jerler men jańadan egilgen daqyldardy saqtaý úshin kıikterdi jaıylymǵa qaraı aıdaý jumystary júrgizilip keledi.
— Egistik jerler men jańa shyqqan daqyldardy saqtaý úshin sońǵy jyldary janýarlardy jaıylymǵa qaraı aıdaýmen aınalysyp kelemiz. Baqylaýda 46 myń gektar aýmaq bar. Bıyl bul jumysqa 50 adam, 13 patrýldik kólik jáne eki júk kóligi jumyldyryldy. Toptar vahtalyq ádispen jumys isteıdi, — deıdi ol.
Buǵan deıin Pavlodar oblysynda kıikterdiń sany bir jylda tórt ese ósip, 120 myńǵa jetkenin jazǵanbyz.
Bıylǵy kóktem mezgilinde kıikter jyldaǵydan kóp qyrylyp, Pavlodar fermerleri indetten úreılenip otyrǵany týraly másele kótergenbiz.
