Pavlodar oblysynyń úzdik medıtsına qyzmetkerleri marapattaldy
PAVLODAR. QazAqparat - Pavlodardyń basty Ertis Promenade sahnasynda medıtsına qyzmetkerleri kúnine oraı saltanatty kontsert ótti, dep habarlaıdy pavlodarnews.kz.
Aýa raıynyń qolaısyzdyǵyna qaramastan medıtsına qyzmetkerlerin tamashalaý úshin ortalyq jaǵalaýǵa birneshe myń adam keldi. Eń aldymen Ertis óńiriniń medıtsına ardagerlerine kóńil bólindi. Odan keıin dárigerlerdi Pavlodar oblysy ákiminiń orynbasary Ashat Oralov quttyqtady. Ol pavlodarlyq medıtsına sońǵy jyldary úlken bıikterge jetkenin jáne eldegi úlgililerdiń biri sanalatynyn atap ótti.
Kontserttiń resmı bóliminde oblystyń úzdik densaýlyq saqtaý qyzmetkerleri marapattaldy. Mereke ıeleri «Eńbek ardageri» medaline, «Qazaqstan Respýblıkasynyń densaýlyq saqtaý isine qosqan úlesi úshin» jáne «Qazaqstan Respýblıkasynyń densaýlyq saqtaý isiniń úzdigi» belgisine, oblys ákiminiń qurmet gramotasy jáne basqa da marapattarǵa ıe boldy.
Sonymen qatar, sahnada 2019 jylǵy Qazaqstannyń úsh úzdik medıtsına qyzmetkeri de ataldy. Jyldyń úzdik dárigeri - oblystyq onkologııalyq dıspanser dırektorynyń orynbasary Telman Alǵojın, densaýlyq saqtaý salasynyń úzdik menedjeri - Pavlodar qalasynyń №3 emhanasynyń bas dárigeri Qaıyrly Qabylov, salanyń úzdik IT qyzmetkeri - №3 emhananyń tsıfrlandyrý menedjeri Sultan Rústemhanov bolyp tańdaldy. Marapattaýdyń eń áserlisi «Ómirlik erligi úshin» nomınatsııasy boldy.
Ótken jyldyń kúzinde altynshy qabattyń terezesinen qulaǵan bes jasar qyzdy qutqaryp qalǵan Aleksandr Jumabaev óziniń qymbat syılyǵyn alyp, qoshemetke bólendi.
