Pavlodar oblysynyń túrmesinde ıogadan sabaq ótkizile bastady

NUR-SULTAN. QazAqparat - Pavlodar oblystyq qylmystyq atqarý júıesi departamentine qarasty AP-162/1 mekemesinde sottalýshylarǵa ıoga jattyǵýlary ótkizile bastady, dep habarlaıdy QazAqparat tilshisi.

Mekemeniń tárbıe jumysy jónindegi bóliminiń qyzmetkerleri osyndaı jańa ádis qoldanýǵa sheshim qabyldaǵan. Atap ótilgendeı, bul sabaqtar sottalýshylardy ózin-ózi ustaýǵa úıretýge baǵyttalǵan. Jan tynyshtyǵyn shyńdaýǵa 7 sottalýshy nıet bildirgen.

«Búgin birinshi sabaq ótkizdik. Aldymen endi úırenip júrgender úshin kýrs tańdap aldyq. Jumystyń mundaı ádisi sottalýshylardyń kúızelisin tómendetip qana qoımaı, olardyń dúnıetanymyn da ózgertedi. Sottalýshylardyń ozbyr minezi birtindep tómendeıdi. Sondyqtan jattyǵýdy odan ary jalǵastyrmaq nıettemiz», - dedi mekeme bastyǵynyń orynbasary Berik Rahymov.

Al mekeme psıhology Baqytgúl Imanbalınovanyń aıtýynsha, ıoga jattyǵýlary emotsııalyq kóńil-kúıdi normaǵa túsirip, sezimdi teńgerimdeýge ári deneni bosańsytýǵa múmkindik beredi.

«Sabaq barysynda jattyǵýdyń birneshe túri júrgizildi. Solardyń biri «streske qarsy relaksatsııa« dep atalady. Bul jattyǵýdyń basty maqsaty – joǵary psıhologııalyq shıelenisti tómendetý. Sottalýshylarǵa ásirese tynys alý jattyǵýlary qatty unady», - dedi ol.

Pavlodar oblystyq qylmystyq atqarý júıesi departamentinen málim etkendeı, mundaı ádis álemniń kóptegen elinde qoldanylady.