Pavlodar oblysynyń turǵynyn qorqytyp, aqsha bopsalaǵan úsh kúdikti qolǵa tústi

ASTANA. QazAqparat - Pavlodar oblysynyń turǵynyn qorqytyp, aqsha bopsalaǵan úsh kúdikti qolǵa tústi, – dep habarlaıdy Polisia.kz.

Uıymdasqan qylmysqa qarsy kúres basqarmasynyń qyzmetkerleri jedel-izdestirý is-sharalaryn júrgizý kezinde UQQKD qyzmetkerlerimen birlesip, Pavlodar oblysy prokýratýrasyn úılestirýimen bopsalaý qylmysy boıynsha kúdikke ilingen azamattardy ustady. Polıtsııaǵa jergilikti turǵyn birneshe aı boıy kúdiktilerdiń oǵan qoqan-loqqy, zorlyq-zombylyq kórsetip, qolma-qol aqsha alǵanyn aıtty. Polıtsııa qyzmetkerleri anyqtaǵandaı, Aqsý qalasynyń úsh turǵyny ózderiniń dene bitimin paıdalana otyryp, jábirlenýshiden júıeli túrde aqsha bopsalaı bastaǵan jáne 100 myń teńge ıemdengen. Sondaı-aq, kúdiktilerdiń biri osyndaı qylmys jasaǵany úshin tergeýde ekeni anyqtaldy.
– Turǵylyqty jeri boıynsha tintý is-sharalary barysynda kúdiktilerden qoldan jasalǵan pyshaqtar, telefondar, sondaı-aq ózge de zattaı dáleldemeler tárkilendi. Osy fakt boıynsha qazirgi ýaqytta Qazaqstan Respýblıkasy QK-niń 194-baby (Qorqytyp alý) boıynsha sotqa deıingi tergeý júrgizilip jatyr, – dedi Pavlodar oblysy PD uıymdasqan qylmysqa qarsy kúres basqarmasynyń bastyǵy Ǵabıt Qabdrahmanov. Osy baptyń sanktsııasymen 3 jyldan 7 jylǵa deıin jaza qarastyrylǵan. Qazaqstan Respýblıkasy Konstıtýtsııasynyń 77-baby 3-tarmaǵynyń 1-tarmaqshasyna, Qazaqstan Respýblıkasy qylmystyq is júrgizý kodeksiniń 19-baby 1-bóligine sáıkes onyń kinási sottyń zańdy kúshine engen úkimimen tanylǵanǵa deıin adam qylmys jasaǵany úshin kináli emes dep esepteledi.