Pavlodar oblysynyń trassasynda 6 adam zardap shekti
EKІBASTUZ. QazAqparat – Pavlodar oblysynyń trassasynda jol-kólik apatynan 6 adam zardap shekti, dep habarlaıdy QazAqparat Pavlodarnews.kz saıtyna silteme jasap.
Oqıǵa Ekibastuz qalasy men Maıqaıyń kenti arasyndaǵy trassada bolǵan. Jol apaty ornynda túsirilgen vıdeo áleýmettik jelide tarady.
Oblystyq Densaýlyq saqtaý basqarmasynyń málimetine sáıkes, eki kóliktiń soqtyǵysýynan 6 adam zardap shekti. Olardyń úsheýi jedel járdem qyzmeti kelgenge deıin oqıǵa ornynan ketip qalǵan. Qalǵan úsheýine medıtsınalyq kómek qajet bolǵan.
«25 jastaǵy er adamda – omyrtqanyń kompressııalyq synýy, sol jaq keýde tusynyń soǵylýy, qursaq bóliginiń syzdap aýyrýy, 32 jastaǵy áıelde – oń jáne sol jaq sanynyń jabyq synýy, qabaq ústindegi teriniń jáne ıektiń jyrtylǵan jaraqaty, 26 jastaǵy er adamda jambas súıeginiń synýy dıagnozdary qoıyldy», - dedi Densaýlyq saqtaý basqarmasynan.
Zardap shekkenderdiń barlyǵy Ekibastuz qalalyq aýrýhanasyna jetkizildi. 32 jastaǵy áıel aýyr jaǵdaıda jansaqtaý bóliminde jatyr.
