Pavlodar oblysynyń trassalarynda 1 adam mert bolyp, tórteýi aýrýhanaǵa tústi
PAVLODAR. QazAqparat – Demalys kúnderi Pavlodar oblysynyń trassalarynda eki jol apaty bolyp, saldarynan 1 adam qaza boldy, taǵy tórteýi aýrýhanaǵa tústi, dep habarlaıdy QazAqparat.
«10 qyrkúıek kúni saǵat 22:00-de «Omby-Maıqapshaǵaı» tasjolynyń 338-shaqyrymynda, Qyzyltań aýylyna jaqyn jerde «TOYOTA SEQUOLA UHPY» kóliginiń 33 jastaǵy júrgizýshisi rýlge ıe bola almaı qalyp, shuńqyrǵa aýdarylyp ketken. Saldarynan jaraqat alǵan 38 jastaǵy jolaýshy aýrýhanaǵa jatqyzyldy», - delingen Pavlodar oblysy polıtsııa departamentiniń baspasóz qyzmeti taratqan málimette.
Taǵy bir jol apaty 11 qyrkúıek túngi saǵat 00:10-da «Lenınskıı-Kýrchatov» kólik jolynyń 101-shi shaqyrymda, Keńtúbek aýylynyń mańynda boldy. Onda «VAZ-21099» jáne «VAZ-2106» kólikteri soqtyǵysqan. Oqıǵa saldarynan «VAZ-2106» kóliginiń 54 jastaǵy jolaýshysy aýyr jaraqat alyp, oqıǵa ornynda qaıtys boldy. 30 jastaǵy júrgizýshi men 29 jastaǵy jolaýshy jáne «VAZ-21099» kóliginiń 48 jastaǵy júrgizýshisi aýrýhanaǵa jetkizildi.
«Atalǵan faktiler boıynsha saraptamalar taǵaıyndaldy. Tergeý júrgizilip jatyr. Kólikter arnaıy turaqqa qoıyldy», - dedi polıtsııadan.
