Pavlodar oblysynyń Súgir aýylynda 600 gektar orman alqaby órtke orandy

ASTANA. QazAqparat – Pavlodar oblysynyń Sharbaqty aýdanyna qarasty Súgir aýylynda tutanǵan orman órti áli sóndirilgen joq, dep habarlaıdy QazAqparat tilshisi.

«Órttiń aýdany shamamen 600 gektardy quraıdy. Turǵyndar arasynda qaıtys bolǵan jáne zardap shekken adamdar joq. Mamandardyń baǵalaýy boıynsha eldimekenderge tónetin qaýip joq. Turǵyndardy evakýatsııalaý júrgizilgen joq», - delingen Pavlodar oblysy ákimdiginiń Telegram arnasynda jarııalanǵan habarlamada.

Jergilikti quzyrly organ dereginshe, órt aýmaǵyna Pavlodar oblysynyń ákimi Asaıyn Baıhanov pen Tótenshe jaǵdaılar mınıstri Syrym Sháriphanov barǵan. Sondaı-aq, qyzyl jalyndy aýyzdyqtaýǵa TJM-niń 2 tikushaǵy jumyldyryldy.

Eske salaıyq, búgin Pavlodar oblysy Tótenshe jaǵdaılar departamentiniń kúshteri men quraldary aptap ystyq pen naızaǵaıǵa baılanysty qyzmet kórsetýdiń kúsheıtilgen nusqasyna kóshkenin habarlap edik. Óńir aýmaǵynda 14 shildede tańǵy saǵat 8-den bastap órt sóndirýshiler 30-dan astam shaqytrýǵa shyqqan. Olarǵa 31 tehnıka men jeke quramnyń 95 adamy jumyldyryldy.

«Qazir Aqtoǵaı, Baıanaýyl, Aqqýly, Sharbaqty aýdany jáne Ekibastuz aýyldyq aımaǵynda órt qaýpi bar. Órt sóndirýshiler 15 órtti sóndirip jatyr», - dep habarlady oblystyń tótenshe jaǵdaılar departamentinen.

Sonymen qatar, Abaı oblysyndaǵy «Semeı ormany» tabıǵı rezervatynan taǵy da órt shyǵyp, Besqaraǵaı aýdanynda tótenshe jaǵdaı jarııalandy.