Pavlodar oblysynyń oqýshylary ǵalamshardy zertteıtin robot jasady
PAVLODAR. QazAqparat - Pavlodar oblysynyń oqýshylary «Juldyzdar bizge sáýle shashady» atty jas astronomdar forýmynda ǵaryshty ıgerýge arnalǵan ǵajaıyp jobalaryn kórsetti, dep habarlaıdy QazAqparat tilshisi.
Pavlodar oblystyq Bilim basqarmasynyń habarlaýynsha, bıylǵy tórtinshi forýmǵa daryndy 45 oqýshy qatysty.
Ekibastuzdaǵy mamandandyrylǵan «Zerde» mektebiniń oqýshylary Dıana Karımova men Zarına Meırasheva tańdaǵan «Kardıostımýlıatordy modeldeý» atty kúrdeli taqyryp kópshilikti tańǵaldyrdy.
«Maıqaıyń kentinen kelgen Kamıla Serikova men Aıym Ýahıttyń jumysy erekshe qyzyǵýshylyq týdyrdy. Jas daryndar Jer tobyndaǵy ǵalamsharlardyń betin burǵylaýǵa múmkindik beretin robotty jasap shyqty. Al Maıqaıyń mektebiniń oqýshysy Aıqanat Baǵynbaevtyń jumysynda tájirıbe júrgizý arqyly alynǵan faktileri qyzyqty boldy», - deıdi Bilim basqarmasynyń ókilderi.
Forým qatysýshylarynyń jobalaryn qazylar alqasy baǵalap otyrdy. Nátıjesinde, Nazarbaev Zııatkerlik mektebiniń oqýshylary Qýanysh Sársekeev pen Alına Parhomchýktyń, sondaı-aq Aqsý gımnazııasynyń oqýshysy Aımıra Ospanovanyń kosmonavtıkanyń sony ádisterimen baılanysty jumystary úzdik dep tanyldy.
«Ǵaryshty zertteý - Qazaqstan ǵylymynyń perspektıvaly baǵyttarynyń biri. Búgingi oqýshylarda Ǵalam men ǵaryshty zertteýge barlyq múmkindik bar. Olar Oqýshylar saraıynda ashylǵan observatorııadaǵy zamanaýı qondyrǵy arqyly juldyzdar men ǵalamsharlardy zertteı alady», - dedi vedomstvodan.
Jeńimpazdar dıplomdarmen marapattaldy.
Foto: Pavlodar oblysynyń Bilim basqarmasy
