Pavlodar oblysynyń monoqalalarynda jylyjaı keshenderi salynady

PAVLODAR. QazAqparat - «Pavlodar» áleýmettik-kásipkerlik korporatsııasy memlekettik aktıvterdi paıdalana otyryp, oblystyń monoqalalarynda jylyjaı keshenderin iske qosýdy josparlap otyr. Bul týraly oblys ákimdiginen málim etti, dep habarlaıdy QazAqparat.

«Pavlodar» ÁKK tóraǵasy Álibek Nesipbekovtiń aıtýynsha, Aqsý men Ekibastuz qalalarynda 12 myń tonna ónim beretin qyzanaq pen qııar ósirýge arnalǵan ınvestıtsııalyq jobany júzege asyrý kózdelgen.

«30 jáne 5 gektar jylyjaı úshin qajetti jer telimderi resimdeldi. Geografııalyq jaǵynan eki joba da jumys istep turǵan elektr stansylarynyń janynda ornalasatyn bolady. Sonyń arqasynda jańa kásiporyn arzan elektr jáne jylý energııasyna qol jetkize alady», - dedi Álibek Nesipbekov.

Aımaq basshysy Bolat Baqaýov árbir jobany ınvestordyń yńǵaıyna qaraı ıkemdeý kerek.

«Mysaly, eger olardyń qatarynda biz buǵan deıin kezdesken reseılik «Ekokýltýra» holdınginiń ókilderi bar deıik. Olar ózderine qajetti qural-jabdyqty jasaýdy kóp ýaqyt buryn qolǵa alǵan. Investorǵa bizdiń jobamyz unamaıtyndaı jaǵdaı týyndaýy múmkin ǵoı», - dedi ol.

Oblys ákimine taǵy da birneshe joba usynyldy. Olardyń qatarynda jylyna júz myń tonna qant óndiretin zaýyt qurylysy, kartop men krahmal óndiretin ónerkásip kesheniniń qurylysy bar. Sondaı-aq Jelezın aýdanynda «Valmount» kompanııasynyń demonstratsııalyq sýarý júıesin ornatý qarastyryldy.